Harresa e herëpashershme mund të jetë pjesë normale e jetës, sidomos gjatë periudhave me stres, lodhje dhe mungesë gjumi. Megjithatë, kujdesi për shëndetin e trurit dhe zakonet e përditshme mund të ndihmojnë në ruajtjen e funksioneve njohëse dhe në uljen e rrezikut të rënies së kujtesës.
Sipas udhëzimeve të përditësuara të Organizatës Botërore të Shëndetësisë (OBSH), aktiviteti fizik, ushqyerja e shëndetshme, stimulimi mendor dhe kontrolli i faktorëve të rrezikut janë pjesë e rëndësishme e strategjive për mbrojtjen e shëndetit të trurit.
Pesë hapa që ndihmojnë në ruajtjen e kujtesës:
- Aktiviteti fizik: Ecja e rregullt dhe ushtrimet ndihmojnë qarkullimin e gjakut dhe shëndetin e përgjithshëm të trurit.
- Gjumi i mjaftueshëm: Një rutinë e rregullt e gjumit ndihmon përqendrimin dhe funksionimin e kujtesës.
- Ushqyerja e ekuilibruar: Konsumoni perime, fruta, peshk, arra dhe ushqime të pasura me fibra.
- Stimulimi mendor: Leximi, lojërat logjike, mësimi i aftësive të reja dhe aktivitetet që kërkojnë përqendrim e mbajnë trurin aktiv.
- Kontrolli i shëndetit: Mbajtja nën kontroll e tensionit të gjakut, diabetit dhe kolesterolit është e rëndësishme për shëndetin e trurit.
Kur duhet kërkuar ndihmë mjekësore?
Nëse harresa bëhet e shpeshtë, përkeqësohet ose fillon të pengojë aktivitetet e përditshme, është e rëndësishme të konsultoheni me mjekun. Problemet me kujtesën nuk nënkuptojnë domosdoshmërisht demencë, pasi mund të lidhen edhe me çrregullime të gjumit, depresion, barna të caktuara ose probleme të tjera shëndetësore./04 Online/
