Një shëtitje e shkurtër pas ngrënies nuk është vetëm mënyrë për të kaluar kohën, por edhe një aktivitet me përfitime të dokumentuara për metabolizmin. Hulumtimet shkencore tregojnë se ecja pas vakteve mund të ndihmojë në kufizimin e rritjes së glukozës në gjak dhe, te disa persona, të lehtësojë shqetësimet e tretjes.
1. Ndihmon në kontrollin e sheqerit në gjak
Një nga përfitimet më të rëndësishme të ecjes pas ushqimit lidhet me mënyrën se si organizmi e përpunon glukozën. Gjatë aktivitetit fizik, muskujt përdorin glukozën për të prodhuar energji, duke ndihmuar në uljen e përqendrimit të saj në gjak.
Një meta-analizë e publikuar në vitin 2023 në revistën shkencore Sports Medicine shqyrtoi tetë studime të kontrolluara, me gjithsej 116 pjesëmarrës, përfshirë persona me dhe pa diabet të tipit 2. Rezultatet treguan se aktiviteti fizik pas ushqimit e zvogëlonte rritjen e glukozës në gjak më shumë sesa mungesa e aktivitetit ose ushtrimet para vaktit. Studiuesit vunë re se përfitimi ishte më i madh kur ecja bëhej sa më afër përfundimit të ngrënies.
2. Mund të lehtësojë ndjenjën e rëndesës në stomak
Ecja me ritëm të lehtë mund të ndikojë edhe në zbrazjen e stomakut. Sipas gastroenterologes Jessica Philpott, nga Cleveland Clinic, lëvizja pas ushqimit mund të ndihmojë që ushqimi të mos qëndrojë gjatë në stomak dhe të lehtësojë te disa persona ndjenjën e ngopjes së tepërt, fryrjen dhe disa simptoma të refluksit.
Megjithatë, reagimi ndryshon nga personi në person dhe ecja nuk është trajtim për sëmundjet e sistemit tretës.
3. Ndihmon në ndërprerjen e qëndrimit të gjatë ulur
Pas ngrënies, shumë njerëz vazhdojnë aktivitetet e tyre ulur, veçanërisht gjatë orarit të punës ose në mbrëmje. Një shëtitje e shkurtër ndërpret këtë pasivitet dhe shton lëvizjen gjatë ditës.
Aktiviteti fizik i rregullt lidhet me përmirësimin e shëndetit metabolik dhe kardiovaskular. Ecja pas ushqimit mund të jetë një mënyrë e lehtë për ta përfshirë atë në rutinën e përditshme.
Sa minuta duhet të ecni pas ngrënies?
Nuk nevojiten ushtrime intensive. Një ecje e lehtë prej 10–15 minutash pas vaktit është një pikënisje e mirë. Studimet kanë shqyrtuar edhe seanca prej 20–30 minutash, por kohëzgjatja mund të përshtatet sipas gjendjes fizike dhe mundësive individuale.
Personat që përjetojnë refluks duhet të shmangin përkuljet dhe ushtrimet intensive menjëherë pas ushqimit, pasi mund t’u përkeqësojnë simptomat.
Ecja pas ngrënies nuk është zgjidhje magjike dhe nuk i zëvendëson aktivitetin e rregullt fizik, ushqyerjen e shëndetshme apo trajtimin mjekësor. Megjithatë, dëshmitë shkencore tregojnë se ky zakon i thjeshtë mund të ndihmojë në kontrollin e glukozës pas vakteve dhe në përmirësimin e disa shqetësimeve të tretjes./04 Online/
