Bayern Munich ka nisur të planifikojë të ardhmen në repartin ofensiv, duke kërkuar pasuesin afatgjatë të Harry Kane.
Kampioni i Gjermanisë ka kthyer vëmendjen nga Premierliga, ku Benjamin Sesko është shndërruar në objektivin kryesor.
Sipas gazetarit të “Sport Bild”, Christian Falk, drejtuesit bavarezë po e monitorojnë nga afër sulmuesin e Manchester United dhe e konsiderojnë atë kandidatin ideal për të zëvendësuar Kane në të ardhmen.
Manchester United është i vetëdijshëm për interesimin në rritje ndaj 23-vjeçarit, i cili iu bashkua klubit nga “Old Trafford” në vitin 2025 për një shumë fillestare prej 76.5 milionë eurosh.
Trajneri Michael Carrick e sheh Seskon si një pjesë kyçe të projektit të tij, pasi sulmuesi slloven realizoi 11 gola në 30 paraqitje në Premierligë gjatë sezonit të kaluar.
Megjithatë, Bayern vazhdon të analizojë opsionet për të siguruar një pasues të denjë të Harry Kane.
Kapiteni i Anglisë mbetet pika kryesore e sulmit të bavarezëve. Që nga transferimi i tij nga Tottenhami për 95 milionë euro në vitin 2023, Kane ka qenë i jashtëzakonshëm në futbollin gjerman.
Sezonin e kaluar, 33-vjeçari zhvilloi edicionin më të mirë të karrierës së tij, duke shënuar plot 61 gola në 51 ndeshje në të gjitha garat.
Në total, Kane ka realizuar 146 gola në 147 paraqitje me fanellën e Bayern Munichut, ndërsa ka fituar dy tituj të Bundesligës, një Kupë të Gjermanisë, një Superkupë të Gjermanisë dhe dy herë “Këpucën e Artë” të Evropës.
Pikërisht për këtë arsye, gjetja e një zëvendësuesi të denjë konsiderohet një mision i vështirë.
Nga ana tjetër, Sesko ka dëshmuar potencialin e tij gjatë periudhës te RB Leipzig, ku shënoi 39 gola në 87 ndeshje në të gjitha garat, duke u konfirmuar si një nga sulmuesit më premtues në Evropë.
Kalimi i tij te Manchester United ka treguar aftësinë për t’u përshtatur edhe në Premierligë, ndonëse aktualisht po rikthehet në formën optimale pas një problemi në kockën e këmbës që i pengoi vazhdimësinë sezonin e kaluar.
United ka refuzuar edhe më herët interesimin për Seskon dhe, duke qenë se klubi synon të forcojë repartin ofensiv për rikthimin në Ligën e Kampionëve, largimi i sulmuesit slloven do të ishte një goditje e madhe për planet e “Djajve të Kuq”.
