Javëve të fundit Kosova ka shënuar rënie të numrit të viktimave dhe rasteve të të infektuarve me COVID-19.
Instituti Kombëtar i Shëndetësisë Publike të Kosovës (IKShPK), ka njoftuar se aktualisht në vend janë 2 mijë e 380 raste aktive me COVID-19.
Kurse që nga 13 marsi i vitit të kaluar (2020) kur edhe u paraqitën dy rastet e para pozitive, janë 107 mijë e 405 qytetarë të cilët janë infektuar me COVID-19.
Shkak i infektimit me virusin korona, nga 22 marsi i 2020-tës, kanë vdekur 2 mijë 243 persona.
“Gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private me metodën RT-PCR, si dhe laboratoret publike dhe private me metodën RAT, janë testuar gjithsej 2.120 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 23 raste pozitive. Brenda 24 orëve nuk është raportuar asnjë rast i vdekjes me SARS CoV-2 pozitiv. Numri total i rasteve pozitive është 107.405 raste nga 609.350 persona të dyshimtë në virusin SARS-CoV-2 dhe 2.243 raste të vdekjes. Gjatë 24 orëve të fundit, janë shëruar 130 pacientë derisa numri i përgjithshëm i të shëruarve deri më sot është gjithsej 102.782 raste, kurse numri i rasteve aktive është 2.380”, thuhet në njoftimin e fundit të IKShPK-së.
