Qeveria e Republikës së Kosovës, i është bashkuar thirrjes së Shteteve të Bashkuara të Amerikës, për strehimin e qytetarëve afganë, pas marrjes së shtetit nga talebanët, raporton Gazeta Blic.
Gazeta Blic merr vesh ekskluzivisht, se afganët që do të qëndrojnë në Kosovë, do të vendosen në tri lokacione të ndryshme.Njëri vend ku do vendosen afganët, do të jetë kampi në afërsi të Aeroportit, ku aktualisht ka edhe disa refugjatë nga Siria. Ndërsa, pjesa tjetër do të vendosen në ish-kampin e TMK-së në Vranidoll dhe në një hotel në dalje të Prishtinës.
Ky burim i ka thënë Gazetës Blic se afganët e parë pritet të vijnë këtë të mërkurë.“Në Vrellë, në Vranidoll dhe në një hotel në dalje të Prishtinës, do vendosen refugjatët afganë. Të mërkurën pritet të arrijnë disa prej tyre”, i tha ndër të tjera ky burim – gazetës.Gazeta Blic ka provuar të flas me zyrtarë të Qeverisë dhe ministrisë së Punëve të Brendshme, por komunikimi me ta ka qenë i pamundur.
Në vendimin e Qeverisë së Kosovës, thuhet se se “Qeveria ka mbajtur mbledhjen e saj të 28-të, kësaj radhe në formë elektronike, në të cilën është miratuar vendimi për ndryshimin dhe plotësimin e pikës 2 të Vendimit të Qeverisë Nr. 01/26 të datës 16.08.2021 për ofrimin e mbrojtjes së përkohshme dhe të menjëhershme personave të rrezikuar nga konflikti i brendshëm në Afganistan”.“Sipas vendimit të miratuar sot, përpos personave që janë në proces të aplikimit për Special Immigrant Visa (Vizave të Veçanta Imigruese) të Shteteve të Bashkuara të Amerikës, mbrojtje të përkohshme dhe të menjëhershëm do t’i ofrohet edhe personave të kualifikuar nën grupin P2 (klasifikim i veçantë i përcaktuar nga Departamenti i Shtetit Amerikan si Prioriteti 2), përfshirë familjarët e këtyre dy grupeve”, thuhet në njoftim.Qeveria e Kosovës të hënën në mbrëmje (16 gusht) ka miratuar kërkesën e Ministrisë së Punëve të Brendshme, për dhënien e mbrojtjes së përkohshme dhe të menjëhershme personave të rrezikuar nga konflikti i brendshëm në Afganistan, të cilët janë në proces të aplikimit për viza migracioni në Shtetet e Bashkuara të Amerikës.Shtetet e Bashkuara kanë kërkuar nga Kosova dhe Shqipëria që të pranojnë një pjesë të punëtorëve afganë që kanë punuar me forcat e huaja, mirëpo që tash ndjehen të pasigurt pasi vendi është marrë nën kontrollin e talibanëve.“Qeveria e vlerëson të nevojshëm ofrimin e mbrojtjes së përkohshme e të menjëhershme personave të rrezikuar nga konflikti i brendshëm në Afganistan. Këta persona do t’i nënshtrohen procesit të verifikimit nga institucionet relevante të sigurisë në rast të nevojës e në qëllim të sigurisë kombëtare”, thuhet në njoftimin e Qeverisë.
