Sa herë që mendojmë për lyerjen e flokëve, imazhi i parë që na vjen në mendje është ai i vajzave që shfletojnë katalogët e ndryshëm për të zgjedhur ngjyrat që dëshirojnë apo që përpiqen të fshijnë ndonjë njollë boje para pasqyrës në shtëpi. Mirëpo ajo nuk është vetëm ekskluzivitet femëror, të shumtë janë djemtë dhe burrat që zgjedhin të rifreskojnë look-un e tyre me një prekje të re.
Të njëjtën gjë ka bërë edhe Luiz Ejlli, i cili ka qenë kryefjala e këtij edicioni të “Big Brother Vip”. Ai na habiti para disa javësh teksa u shndërrua në biond, një ngjyrë që për hir të së vërtetës i shkon shumë dhe duket se është bërë fiks për të.
Të frymëzuar prej tij të njëjtën gjë do të bënin edhe lojtarët e FC Drita dhe së fundmi edhe banori tjetër i shtëpisë më të vëzhguar të momentit, fotografi Pirro Beati.
E mesa duket djemtë kanë qëlluar në shenjë pasi ngjyra e përzgjedhur prej tyre është ngjyra më IN e momentit. Sipas Tony Ross, parukierit të njohur të Milano Fashion Week, shumë meshkuj po zgjedhin të dekolorojnë flokët dhe të guxojnë me nuancat e platinit, biondes dhe grisë.
