Ka kohë që partitë opozitare kërkojnë rrëzimin e Qeverisë së Albin Kurtit, por deri tash nuk kanë marrë bashkarisht asnjë veprim, shkruan Gazeta Sinjali.
Më i zëshmi në çështjen e rrëzimit të Albin Kurtit ka dalë të jetë lideri i AAK-së, Ramush Haradinaj.
Ka kohë që në secilën paraqitje apo shkrim në Facebook, ai e kërkon me çdo kusht rrëzimin e kabinetit të udhëhequr nga i pari i VV-së.
Kështu veproi edhe një ditë pasi dështuan bisedimet në Bruksel ndërmjet kryeministrit Albin Kurti dhe presidentit serb, Aleksandar Vuçiq.
“Situata e krijuar pas dështimit në Bruksel, me tendencë të thellimit të krizës, me pasoja të rënda për popullin e Kosovës, kërkojnë reflektim urgjent nga Kurti dhe qeveria e tij”.
“Ai duhet të dorëhiqet dhe ta kthejë mandatin te populli. Këtë veprim duhet ta bëjë edhe nëse ai mendon se është në rrugë të drejtë. Ai obligohet ta pyes popullin se çka mendon për veprimet e tij. Në demokraci zgjedhjet janë përgjigja më e mirë”, tha Haradinaj, shkruan Gazeta Sinjali.
Nëse kjo nuk ndodh, Haradinaj thotë se kjo mbetet përgjegjësi “e në të tjerëve”.
“Në rast të mungesës së reflektimit të Kurtit, mbetet përgjegjësi e ne të tjerëve, të bashkohemi e të veprojmë urgjent për ta dërguar vendin në zgjedhje, duke e shkarkuar Kurtin përmes mocionit të mosbesimit”, tha ai.
Por, sa janë të bashkërenduara partitë opozitare?
Zyra për media e AAK-së, në një deklaratë për Gazetën Sinjali ka thënë se opozita ka vazhdimisht komunikim ne mes vete
“Opozita ka vazhdimisht komunikim ne mes vete dhe bashkërendim të veprimeve, në frymen e bashkëpunimit dhe koordinimit për temat me rëndësi, sikurse kjo e mocionit te mosbesimit ndaj qeverisë”, thuhet në përgjigjen e AAK-së për Gazetën Sinjali.
Sipas AAK-së është mëse i nevojshëm të procesohet mocioni i votëbesimit.
“Ështe më se e nevojshme të procesohet mocioni i votëbesimit në mënyre që të jepet hapësira për zgjedhje dhe të lirohet ngulfatja kolektive qe e shkaktoi ky Kryeministër mashtrues e i papërgjegjshëm”.
“Kurti tash deshiron t’i provokojë zgjedhjet duke e luajtur rolin e viktimes, por zgjedhjet s’ka nevoje t’i provokoje sepse ne jemi gati per ta rrezuar me voten e popullit”.
Sipas AAK-së, “populli e ka kuptuar që në qeverisjen e brendshme ka ndjellë korrupsion me Nagipin, Martinin e Ridin dhe ka dështuar t’i përmbush pothuajshe të gjitha premtimet për të cilat edhe ka marrë besimin për të udhehequr”.
“Ne e mbajmë për fjale ne zhdukjen e opozites, andaj edhe e ftojmë të matemi në zgjedhje. Politika e Kosovës ka vetëm një konstante, popullin që don dhe din të bëj ndryshimin”, thuhet në reagimin e AAK-së për Gazetën Sinjali.
Edhe kryetari i PDK-së, Memli Krasniqi, që një kohë po e kërkon dorëheqjen e Kurtit, duke i kërkuar të matet në zgjedhje të reja parlamentare.
“Këtë vit unë besoj se duhet të shkojmë në zgjedhje të jashtëzakonshme. A është dhjetori a është tetori, është relevante, sa më herët është më mirë. Unë besoj që s’duhet me u frikësu prej zgjedhjeve”.
“Nëse Qeveria, nëse kryeministri Kurti beson që ka bo punë të mirë, beson që ka mbështetje, hajde dalim në zgjedhje dhe shikoje a po të besojnë njerëzit njëjtë. Nuk janë më me rëndësi sondazhet. Ato janë irelevante, sondazhi i vetëm që vlen sot është kutia e votimit, qytetari i Kosovës”, tha ai, shkruan Gazeta Sinjali.
Dorëheqjen e ka kërkuar edhe partia e Lumir Abdixhikut, Lidhja Demokratike e Kosovës, por deri tash kjo kërkesë e partive opozitare nuk ka ngjarë asgjë në praktikë.
