Kylian Mbappé vazhdon të jetë një prej futbollistëve më të mirë në botë, por Topi i Artë ende i mungon koleksionit të tij.
Pas përfundimit në vendin e dytë në edicionin e vitit 2026, ylli francez krahasohet me Charles Leclerc, pilotin e Ferrarit që ende pret titullin e kampionit të botës në Formula 1.
67 gola në 75 ndeshje me Real Madridin, 162 gola në 178 paraqitje me Paris Saint-Germainin, një Kupë Bote e fituar si protagonist dhe suksese që nga koha kur ishte vetëm 18 vjeç me Monacon.
Megjithatë, për Kylian Mbappén, fitimi i Topit të Artë po rezulton një mision tejet i vështirë, shkruan “Gazeta Express”.
Francezi përfundoi në vendin e dytë në garën e vitit 2026, pas Harry Kane, edhe pse ka ndërtuar një karrierë të jashtëzakonshme dhe ka fituar çmime të rëndësishme individuale, përfshirë Këpucën e Artë me Real Madridin.
Problemi për Mbappén është se këtë sezon nuk arriti të fitojë trofe me klubin apo me kombëtaren franceze.
Ndërkohë, Lamine Yamal vazhdon të rritet dhe ka mbështetjen e Barcelonës dhe të përfaqësueses së Spanjës, çka mund ta bëjë edhe më të vështirë rrugën e francezit drejt çmimit më prestigjioz individual.
Mbappé dhe Leclerc, dy kampionë në kërkim të kurorës
Krahasimi me Charles Leclerc mund të duket i pazakontë, duke pasur parasysh dallimet mes futbollit dhe Formula 1.
Megjithatë, të dy kanë një ngjashmëri: talentin e madh dhe vështirësinë për të arritur çmimin ose titullin më të rëndësishëm në fushën e tyre.
Leclerc mbërriti te Ferrari pas sukseseve në kategoritë e mëparshme të garave automobilistike dhe arriti të binte menjëherë në sy, por deri tani nuk ka fituar titullin e kampionit të botës në Formula 1.
Fillimisht, dominimi i Mercedesit e vështirësoi garën për titull, më pas erdhi epoka e Max Verstappenit, ndërsa më vonë edhe McLaren arriti të rikthehej në majën e Formula 1.
Në këtë periudhë, Leclerc ka vazhduar të luftojë për ta mbajtur Ferrarin konkurrues, ndërsa rivalët kanë arritur suksese të rëndësishme.
Për Mbappén, situata është e ngjashme në aspektin e mungesës së çmimit më të madh individual.
Ai ka shënuar gola me ritëm të jashtëzakonshëm dhe ka fituar trofe të rëndësishëm, por Topi i Artë ende nuk ka përfunduar në duart e tij.
Tashmë, në moshën 27-vjeçare dhe me 28-vjetorin që po afrohet, sulmuesi francez duhet të vazhdojë të kërkojë sukseset e mëdha me Real Madridin nëse dëshiron të kurorëzojë karrierën edhe me çmimin individual më prestigjioz. /Express
