E ardhmja e Edon Zhegrovës te Juventusi vazhdon të mbetet e paqartë, ndërsa interesimi për reprezentuesin e Kosovës po rritet nga jashtë Italisë.
Sipas raportimeve të mediave italiane dhe turke, Trabzonspori e ka vendosur anësorin kosovar në mesin e objektivave kryesorë për përforcimin e repartit ofensiv gjatë afatit kalimtar veror, shkruan 04 Online.
Zhegrova iu bashkua Juventusit nga Lille në verën e vitit 2025, por deri më tani nuk ka arritur të sigurojë hapësirat e dëshiruara në formacionin e skuadrës bardhezi. Konkurrenca e fortë në fazën sulmuese dhe minutat e kufizuara kanë bërë që drejtuesit e klubit italian të shqyrtojnë mundësinë e largimit të tij.
Raportimet bëjnë të ditur se Trabzonspori po punon për një marrëveshje në formën e huazimit me të drejtë ose detyrim blerjeje. Nga ana tjetër, Juventusi nuk pritet të paraqesë pengesa nëse arrihet një marrëveshje që i garanton futbollistit më shumë minuta dhe rol më të rëndësishëm në skuadrën e re.
Klubi turk konsiderohet aktualisht një nga ekipet më serioze në garë për shërbimet e yllit kosovar, i cili po analizon me kujdes të ardhmen e tij.
Një nga faktorët kryesorë që mund të ndikojë në vendimin e Zhegrovës mbetet dëshira për të luajtur rregullisht dhe për të qenë protagonist në fushë, veçanërisht në një periudhë të rëndësishme edhe për Kombëtaren e Kosovës.
Në rast se transferimi realizohet, Trabzonspori do të siguronte një futbollist me cilësi të larta teknike dhe eksperiencë ndërkombëtare, ndërsa Zhegrova do të kishte mundësinë të merrte një rol më të rëndësishëm sesa ai që ka pasur gjatë sezonit të fundit te Juventusi.
Për momentin, bisedimet mbeten në fazat fillestare dhe ende nuk ka një ofertë zyrtare, por zhvillimet e ardhshme pritet të përcaktojnë destinacionin e radhës të futbollistit kosovar./04 Online
