Sot shënohen dhjetë vjet nga një nga momentet më historike për sportin në vend, anëtarësimi i Kosovës në UEFA, duke u bërë anëtarja e 55-të e kësaj organizate evropiane të futbollit.
Më 3 maj 2016, në kongresin e mbajtur në Budapest, Kosova u pranua me 28 vota pro, 24 kundër dhe dy abstenime, duke fituar të drejtën për të garuar zyrtarisht në garat evropiane.
Një rol kyç në këtë proces kishte ish-kreu i Federatës së Futbollit të Kosovës, legjenda Fadil Vokrri, i cili e cilësoi këtë arritje si një drejtësi të vonuar për futbollin kosovar.
Anëtarësimi në UEFA hapi një kapitull të ri për Kosovën, duke i mundësuar përfaqësueses dhe klubeve vendore të marrin pjesë në garat ndërkombëtare dhe të zhvillojnë më tej futbollin në arenën evropiane.
Megjithatë, rruga drejt këtij suksesi nuk ishte e lehtë. Kundër anëtarësimit të Kosovës kishte votuar Serbia, duke reflektuar sfidat politike që e kanë shoqëruar sportin ndër vite.
Sot, një dekadë më pas, ky përvjetor rikujton një moment historik që shënoi afirmimin ndërkombëtar të futbollit kosovar dhe hapjen e dyerve drejt një të ardhmeje më të ndritur në sport.
