UEFA ka vendosur të mos ndjekë shembullin e FIFA-s për të futur kartonët e kuq automatik për lojtarët që mbulojnë gojën kur përballen me një kundërshtar ose largohen nga fusha në shenjë proteste ndaj një vendimi të gjyqtarit.
Organi që përcakton rregullat e futbollit, International Football Association Board (IFAB), i miratoi këto rregulla muajin e kaluar me kërkesë të FIFA-s dhe ato do të hyjnë në fuqi më 1 qershor, me ç’rast gjyqtarët do të udhëzohen t’i zbatojnë në Kupën e Botës. Por vendimi i UEFA-s nënkupton se këto rregulla nuk do të aplikohen në Ligën e Kampionëve për meshkuj dhe femra, si dhe në garat e tjera të saj të klubeve.
FIFA po reagon ndaj dy polemikave të mëdha të këtij viti, që synon të mos përsëriten në Kupën e Botës. Njëra prej tyre ndodhi gjatë një ndeshjeje të Ligës së Kampionëve, raporton theguardian.
Vinícius Júnior i Real Madridit akuzoi Gianluca Prestianni të Benficës për abuzim racor, ndërsa ky i fundit mbuloi gojën me fanellë gjatë një ndeshjeje në shkurt. Lojtari argjentinas u dënua nga UEFA me gjashtë ndeshje pezullim, prej të cilave tre u pezulluan me kusht për dy vite, pasi u gjet fajtor për sjellje homofobike.
Në janar, finalja e Kupës së Kombeve të Afrikës u shoqërua me polemika pasi lojtarët e Senegalit u larguan nga fusha për 15 minuta në shenjë proteste ndaj një penalltie të dhënë për Marokun.
Brahim Díaz i Marokut e humbi penalltinë, ndërsa Senegali fitoi pas kohës shtesë, por komiteti i apelit i Konfederatës Afrikane të Futbollit e shpalli Marokun fitues 3-0 në mars, vendim që Senegali e ka apeluar në Gjykatën e Arbitrazhit Sportiv.
IFAB nuk ka detyruar që këto ndryshime të zbatohen në të gjitha garat. Komiteti ekzekutiv i UEFA-s do të mblidhet për herë të fundit këtë sezon në Stamboll të mërkurën dhe nuk pritet të ketë ndryshime rregullash në rendin e ditës.
Pas këtij takimi, komiteti për garat e klubeve të UEFA-s do të miratojë rregulloret për sezonin e ardhshëm të kompeticioneve për meshkuj dhe femra në Lajpcig javën e ardhshme, pa ndryshime të mëdha të pritshme.
Burime nga UEFA kanë bërë të ditur se komiteti i gjyqtarëve do të monitorojë ndikimin e rregullave të reja gjatë Kupës së Botës, me qëllim diskutimin e mundshëm të ndryshimeve në sezonin e ardhshëm.
Ligat vendore kanë të drejtë të vendosin vetë nëse do t’i miratojnë këto rregulla. Premier League do të konfirmojë planet për sezonin e ardhshëm pas mbledhjes vjetore të klubeve muajin e ardhshëm. Duke qenë se deri tani vetëm FIFA ka konfirmuar zbatimin e tyre, ka gjasa që ato të mos adoptohen nga ligat e tjera.
