Cesc Fàbregas ka folur për rrugëtimin e tij si trajner dhe për eksperiencën që po e përjeton te Como, klub të cilin brenda tre vitesh e ka rikthyer në Serie A dhe e ka çuar për herë të parë në histori në Champions League, pas vendit të katërt të sezonit të kaluar.
Në intervistën e dhënë për drejtorin e Corriere dello Sport, Ivan Zazzaroni, Fàbregas i veçoi disa ndeshje që e kanë bërë veçanërisht krenar për futbollin e treguar nga skuadra e tij, përcjell “Gazeta Express”.
Ai e përmendi fillimisht fitoren 3-0 ndaj Lazios në udhëtim, por edhe ndeshjen e kthimit në Romë, ku, sipas tij, Como e shfaqi futbollin që e emocionon më shumë.
Fàbregas e kujtoi përdorimin e Caqueret si “9 fals”, ndërsa në formacion ishin edhe Nico Paz, Baturina, Perrone e Da Cunha, me Sergi Roberto që hyri më vonë në lojë.
Një tjetër ndeshje që spanjolli e veçoi ishte fitorja 2-0 ndaj Juventusit në Allianz Stadium.
“Edhe duke luajtur me një strukturë pak më ndryshe, skuadra e tregoi një personalitet që më pëlqeu shumë”, tha Fàbregas.
Messi apo Cristiano Ronaldo?
Më pas, intervista kaloi te një pyetje shumë interesante: cilin do ta kishte më stimuluese ta stërviste, Cristiano Ronaldon apo Lionel Messin?
Fàbregas e zgjodhi Messin. “Besoj Leon, sepse e njoh. E di tashmë çfarë mund t’i kërkoj, çfarë di të bëjë, cili është pozicioni më i mirë për të dhe cili është konteksti më i mirë”, u shpreh ai.
Sa i përket Cristiano Ronaldos, Fàbregas e pranoi se do të ishte një sfidë shumë e rëndësishme.
“Do të ishte një sfidë e madhe. Do të duhej ta njihja pak më shumë”, tha trajneri i Comos.
Në fund, ai e theksoi lidhjen e veçantë që e ka me Messin, pasi të dy janë njohur që nga periudha e tyre te Barcelona.
“Leon e njoh, është miku i gjithë jetës. E njoh në mënyrë perfekte. A do t’i thosha ‘bëj këtë, bëj atë’? Jo, por mund të flisnim për këtë”, përfundoi Fàbregas.
