Si asnjë lojtar tjetër më parë, Leart Paqarada i ka bërë katër asistime gjatë një pjese të një ndeshjeje në Bundesliga 2 të Gjermanisë. Në fund katër asistimet e tij kishin vlerën e një pike.
Ndonëse Koelni udhëhoqi 3:0 ndaj Karlsruhes, të dielën, ndeshja e kategorisë së dytë gjermane përfundoi 4:4.
Tri asistimet e para mbrojtësi i majtë i Kosovës i bëri deri në minutën e 15-të. Madje njëri prej asistimeve ishte pasim i shkëlqyer nga distanca.
Në minutën e dytë shtesë të pjesës së parë, Paqarada përgatiti edhe golin e katërt.
Në pjesën e dytë Karlsruhe barazoi prej 4:2 në 4:4.
Paqarada nuk është dukur i lumtur pas ndeshjes.
“Dukem si dikush që la epërsinë 3:0 të kthehet në barazim 4:4”, ka thënë 29-vjeçari.
Paqarada është në edicionin e dytë te Koelni. Edicioni i tij i parë, në Bundesligë, nuk ishte shumë i suksesshëm. Nuk shfaqi as për së afërmi formën që kishte te St. Pauli, shkruan “express.de”.
Por në javët e fundit Paqarada po shfaq formë gjithnjë e më të lartë.
“Po ndihem shumë mirë mentalisht dhe fizikisht për momentin. Po ndiej shumë besim nga ekipi i trajnerëve dhe është e rëndësishme për mua të shpërblej këtë besim me paraqitje”, ka thënë Paqarada, duke shtuar: “Po paraqitem në ndeshje me besim dhe jam i lumtur që kam bërë katër asistime. Kam menduar se do të ndihesha më mirë për këtë. Por nuk po ndihem për momentin”.
Për Koelnin funksionuan gjërat në sulm, por jo edhe në mbrojtje. Njëjtë ishte edhe për Paqaradën, sipas gazetës gjermane. Ai u vonua në dy golat e parë që erdhën pas krosimeve.
Por katër asistime rrallë shihen në një ndeshje futbolli, nga i njëjti lojtar. Dhe te Koelni janë të kënaqur me kosovarin.
“Mendoj që Paqarada sërish është paraqitur shumë mirë dhe ka dëshmuar sërish se sa i rëndësishëm është për këtë ekip”, ka thënë trajneri i Koelnit, Gerhard Struber.
Paqarada, ashtu si pritej, zuri vend në ekipin e xhiros në Bundesliga 2. Ai ftohet rregullisht te Kosova, por jo gjithnjë është zgjidhje e parë për krahun e majtë./Koha
