Këngëtarja Jonida Maliqi ka folur hapur për marrëdhënien e saj me ish-banorin e “Big Brother VIP 5”, Alessio Alia, duke rrëfyer se si kjo lidhje ka ndikuar në jetën e saj personale dhe në mënyrën se si e përjeton dashurinë.
E ftuar në emisionin “Live From Tirana”, artistja u ndal te sfidat e një marrëdhënieje në distancë, rëndësia e qartësisë në çift dhe dëshira për ta mbajtur jetën private larg vëmendjes së tepërt mediatike.
Jonida sqaroi se si ajo, ashtu edhe Alessio, janë prindër të divorcuar, të cilët kanë lënë pas marrëdhëniet e mëparshme dhe kanë nisur një kapitull të ri në jetën e tyre.
Sipas këngëtares, të dy e konsiderojnë të rëndësishme që marrëdhënia të jetë e qartë, duke respektuar njëkohësisht fëmijët dhe familjet përkatëse.
“Alessio më rikthen fëmijën që kam brenda”
Duke folur për raportin me partnerin, Jonida pranoi se distanca ka sjellë momente të bukura ribashkimi, por edhe periudha pasigurie e mosbesimi.
Megjithatë, ajo theksoi se ajo që ka më shumë rëndësi është mënyra se si ndihet në këtë marrëdhënie.
“Alessio hera-herës më kthen fëmijën që kam brenda dhe është gjëja më e bukur në botë”, u shpreh këngëtarja.
Artistja pranoi se nuk e ka problem ta shprehë dashurinë për partnerin, por preferon të mos bëjë deklarata të mëdha publike për marrëdhënien e tyre.
Sipas saj, ky qëndrim lidhet kryesisht me dëshirën për t’i mbrojtur fëmijët dhe familjet nga keqinterpretimet dhe titujt sensacionalë.
Jonida Maliqi: Pas të dyzetave fillon ta duash më shumë veten
Gjatë intervistës, këngëtarja foli edhe për ndryshimet që ka përjetuar me kalimin e viteve dhe për mënyrën se si e sheh tashmë jetën.
E pyetur për gjërat që ende nuk i ka realizuar, Jonida tha se pas moshës 40-vjeçare ka nisur një fazë të re reflektimi dhe vetënjohjeje.
“Mendoj që çdo individ pas të dyzetave fillon dhe reflekton më shumë për veten. Fillon e do veten më shumë dhe fillon të marrë më pak në konsideratë mendimin e të tjerëve”, deklaroi ajo.
Sipas artistes, kjo pjekuri vjen natyrshëm përmes përvojave personale, sidomos pas periudhave të vështira që e bëjnë njeriun të kuptojë se çfarë ka vërtet rëndësi.
Jonida theksoi se sot dëshiron ta jetojë jetën sipas zgjedhjeve të saj, pa u ndikuar nga gjykimet e të tjerëve.
Ajo u shpreh se tashmë është më e kujdesshme me mënyrën se si e shpenzon energjinë emocionale, duke zgjedhur t’ua kushtojë kohën dhe vëmendjen vetëm njerëzve që kanë vërtet rëndësi për të. /GazetaExpress/
