Arsenali raportohet se po synon transferimin e një mesfushori të dytë, ndërsa Bruno Guimarães duket se është shumë pranë kalimit te “Topçinjtë”.
Kapiteni i Newcastle, Bruno Guimarães, është lidhur gjatë gjithë verës me një transferim te kampioni i Premierligës.
Mediumi francez “L’Équipe” raportoi të premten (31 korrik) se Arsenali ka arritur marrëveshje për një tarifë fillestare prej 77 milionë funtesh, ndërsa negociatat për bonuset dhe komisionet e agjentëve janë ende në vazhdim.
Guimarães nuk pritet të udhëtojë me Newcastle në kampin stërvitor parasezonal në La Manga, çka sugjeron se transferimi i tij mund të finalizohet në ditët në vijim.
Mikel Arteta shpreson që braziliani të krijojë një repart të fuqishëm të mesfushës së bashku me Declan Rice, Martin Zubimendi dhe Mikel Merino.
Megjithatë, sipas mediumit gjerman “Fussballdaten”, kampioni i Premierligës ka vendosur në krye të listës së dëshirave edhe mesfushorin defensiv japonez të Mainzit, Kaishu Sano, menjëherë pas arritjes së marrëveshjes për Guimarãesin, madje tashmë ka kontaktuar edhe përfaqësuesit e lojtarit.
25-vjeçari po ndiqet nga disa klube angleze, përfshirë Liverpoolin, Tottenhamin dhe Newcastle, pasi klubet e Premierligës janë impresionuar nga puna e tij në fazën mbrojtëse, cilësitë teknike dhe aftësia për të përshkuar distanca të mëdha gjatë ndeshjeve.
“Fussballdaten” raporton se Mainzi e vlerëson reprezentuesin japonez mes 43 dhe 51 milionë funtesh, ndërsa ai ka kontratë me klubin gjerman deri në vitin 2028.
Sano, i cili regjistroi tri paraqitje në Kupën e Botës 2026, iu bashkua Mainzit në vitin 2024, pasi më parë kishte luajtur për Machida Zelvia dhe Kashima Antlers në Japoni.
Nëse transferohet te Arsenali, Sano pritet të ketë fillimisht rolin e një lojtari rotacioni, pasi londinezët do të garojnë sërish në katër kompeticione sezonin e ardhshëm: Premierligë, Ligën e Kampionëve, FA Cup dhe Carabao Cup.
Edhe Milani është i interesuar për mesfushorin, por preferon një huazim me detyrim blerjeje, në vend të pagesës së plotë të kartonit gjatë kësaj vere.
Tottenhami gjithashtu ka kontaktuar dhe ka zhvilluar bisedime të drejtpërdrejta me agjentin e lojtarit, ndërsa Liverpooli vazhdon të mbajë kontakte me Mainzin.
Në një intervistë të fundit për mediumin gjerman “BILD”, drejtori sportiv i Mainzit, Christian Heidel, deklaroi se klubi “nuk është i detyruar ta shesë” Sanon këtë verë.
“E dini që neve na pëlqen t’i përgatisim transferimet në mënyrë që publiku t’i mësojë vetëm kur t’i zyrtarizojmë. Dhe zakonisht ia dalim! Nuk do të komentoj thashethemet dhe as nuk do të flas për klubet që përmenden. Nuk kemi nevojë ta shesim Kaishun; kemi mundësi ta mbajmë. Nëse qëndron, shumë njerëz në skuadër, në klub dhe në komunitetin përreth do të jenë të lumtur. Por, si gjithmonë te Mainzi, nëse vjen një ofertë që na lë pa frymë, atëherë duhet ta shqyrtojmë”, tha ai.
Kjo deklaratë vjen pasi ai kishte pranuar edhe në fillim të muajit qershor se kishte interesim të madh për futbollistin.
“Dihet se Anglia është kampionati ku zakonisht transferohen lojtarët më të mirë. Përparësia jonë e madhe është se lojtari ka ende kontratë afatgjatë, ndaj nuk kemi asnjë presion dhe nuk do të nxitojmë. Nëse një klub vjen me ofertë, do ta shqyrtojmë. Nëse sipas vlerësimit tonë ajo nuk përputhet me vlerën reale të lojtarit në treg, atëherë është plotësisht e mundur që Kaishu të qëndrojë më gjatë te Mainzi. Sot për sot gjithçka mbetet e hapur. Por e dimë se kemi një lojtar që po zgjon shumë interesim”, e mbylli ai.
