Qeveria e Kosovës së shpejti do të hartojë kontratën e re ndërsektoriale koletive.
Kështu bëri të ditur kryeministri Albin Kurti, në mbledhjen e ekzekutivit këtë të mërkurë.
Ai tha se kontrata do të hartohet në përputhje me mundësitë buxhetore për pagat e reja për punonjësit në Republikën e Kosovës.
“Qeveria e Kosovës, ministria përkatëse e punës, po përgatitemi për të hapur dialogun intensiv mbi diskutimin e kontratës së ardhshme ndërsektoriale kolektive për punonjësit tanë”, deklaroi Kurti.
“Ne do të paraqesim së shpejti paketën e re për kontratën ndërsektoriale në përputhje me mundësitë buxhetore për pagat e reja, për mbështetjen e dinjitetit të të punësuarve në Republikën e Kosovës”.
Ai tutje u shpreh se deri tani ka pasur kontrata kolektive të fragmentuara dhe në pak sektor.
“Ato kanë qenë të hartuara pa u përfillur çështja e kostos buxhetore duke na dëftuar se çfarë kanë qenë qëllimet e hartimit të tyre”, shtoi Kurti.
Ndryshe, Ministria e Arsimit, Shkencës, Teknologjisë dhe Inovacionit (MASHTI), të martën ka bërë shkëputjen e Kontratës Kolektive me SBASHK-un, e cila ishte e nënshkruar më 22 janar 2021.
Shkëputja e kësaj kontrate nga MASHTI u tha se u bë për shkak të shkeljeve të shumta ligjore.
E ky vendim u cilësua i njëanshëm dhe i paligjshëm nga ana e përfaqësuesve të SBASHK-ut.
