Albatrit Osmanaj është dënuar sot me nëntë vjet burgim për vrasjen e kushëririt të tij, 27-vjeçarit Albian Osmanaj, në fshatin Kobaj të Prizrenit.
Rasti kishte ndodhur më 14 qershor 2026, kur një përleshje mes familjarësh kishte përfunduar me vdekjen e Albianit dhe plagosjen e babait të tij, 57-vjeçar. Konflikti dyshohej të kishte nisur nga një mosmarrëveshje për emërtimin e një rruge në fshat.
Siç kishte raportuar Sinjali, duke iu referuar burimeve të veta, palët e përfshira ishin djem të axhës. Njëra palë kishte kërkuar që rruga të mbante emrin e babait, ndërsa tjetra kishte këmbëngulur që ajo të emërtohej sipas gjyshit. Kjo mosmarrëveshje dyshohej të kishte nxitur përplasjen që më pas kishte kaluar në dhunë dhe përdorim të mjeteve të mprehta.
Pas përleshjes, Albiani dhe babai i tij ishin dërguar bashkë në Emergjencën e Prizrenit, rreth orës 12:00. Mjeku kujdestar, Kujtim Kryeziu, kishte treguar se 27-vjeçari kishte mbërritur me lëndim fatal në gjoks dhe se përpjekjet për reanimim nuk kishin mundur t’ia shpëtonin jetën.
“Pacienti i ndjerë kishte lëndim fatal në regjionin e gjoksit”, kishte deklaruar Kryeziu.
Edhe babai i viktimës kishte marrë lëndim në anën e majtë të gjoksit. Sipas mjekut, atij nuk i ishte prekur zemra dhe ishte pranuar në repartin e Kirurgjisë për trajtim të mëtejshëm. Pas ndërhyrjes së kirurgut, gjendja e tij ishte raportuar stabile.
Në vendin e ngjarjes kishin dalë njësitë policore, hetuesit dhe ekipi i forenzikës, të cilët kishin nisur ekzaminimet dhe mbledhjen e provave. Me urdhër të Prokurorit të Shtetit, trupi i pajetë i 27-vjeçarit ishte dërguar për obduksion.
Po atë ditë, Sinjali kishte raportuar ndalimin dhe intervistimin e Albatrit Osmanajt si i dyshuar për përfshirje në përleshje. Në raportimet pasuese ishte bërë e ditur se për rastin ishin ndaluar dy persona, mes tyre edhe një i mitur.
Albian Osmanaj ishte djali i vetëm i familjes. Pas vdekjes së tij, familjarët kishin njoftuar se varrimi do të mbahej më 15 qershor 2026, në kohën e ikindisë, një ditë pas ngjarjes që i mori jetën./Gazeta Sinjali/
