Kryeministri Albin Kurti, në seancën solemne me rastin e 25-vjetorit të Ditës së Çlirimit të Kosovës, tha se nga historia e vendit tonë, Kosova ka nxjerrë mësime dhe kjo kuptohet nga rreshtimi i shtetit krah aleatëve, raporton Gazeta Sinjali.
Kurti, i cili aq shumë është kritikuar për raportet me aleatët, sot tha se Kosova ka shkuar duke i forcuar lidhjet dhe aleancën, ndër të tjera edhe me SHBA-në.
“Të bashkohemi fizikisht e shpirtërisht, për të shënuar një ngjarje historike, që na e ka sjellë të tashmen dhe e ka përcaktuar të ardhmen. Nga kjo histori duhet të nxjerrë mësime, siç kemi bërë deri sot. Dhe kjo kuptohet më së miri nga rreshtimi i vendeve tona sot. Sikur atëherë edhe tani, Serbia rri e rreshtuar prapa Rusisë, kurse shteti ynë bashkë me Shqipërinë ka shkuar duke i forcuar lidhjet dhe aleancën e saj me Shtetet e Bashkuara të Amerikës, Britaninë e Madhe, Gjermaninë, Turqinë, Francën e Italinë e partnerët tjerë. Bashkimi Evropian është familja jonë e synuar politike, kurse NATO destinimi ushtarak.” – tha Kurti, raporton Sinjali.
I pranishëm në seancë është edhe shefi i atëhershëm i Misionit Verifikues të Organizatës për Siguri dhe Bashkëpunim në Evropë (OSBE), William Walker.
Të pranishëm janë gjithashtu edhe presidenti i Shqipërisë Bajram Begaj, si dhe ish-president i Kroacisë, Stipe Mesiq.
