Kandidatja për deputet nga LDK, Ajlin Shishko, shprehu mirënjohjen e saj për çdo mbështetje dhe angazhim të qytetarëve gjatë fushatës.
Ajo theksoi se ky proces nuk ka qenë vetëm një garë politike, por një mundësi për të dëgjuar qytetarët dhe për të ndarë vizionin e saj për një të ardhme më të drejtë dhe të zhvilluar për Kosovën.
Ajo u shpreh se, pavarësisht nga rezultati, angazhimi i saj për qytetarët do të vazhdojë, dhe ftoi të gjithë të dalin të votojnë me besim për një zhvillim të qëndrueshëm dhe përfaqësim të ndershëm.
Postimi i plotë:
Të dashur qytetarë, miq dhe mbështetës,
Sonte, teksa po i afrohemi fundit të kësaj fushate, dua të shpreh mirënjohjen time më të thellë për çdo takim, çdo bisedë dhe çdo përkrahje që më keni dhënë gjatë këtyre ditëve. Kjo fushatë nuk ka qenë vetëm një garë politike – ka qenë një mundësi për të dëgjuar zërin tuaj, për të ndarë vizionin tonë dhe për të ndërtuar së bashku një të ardhme për Kosovën.
Gjatë këtyre javëve, kemi parë sa shumë potencial ka vendi ynë, sa shumë njerëz punojnë me pasion dhe përkushtim për të ndërtuar një Kosovë më të zhvilluar dhe më të drejtë. Kemi folur për sfidat dhe mundësitë, për rrugët që duhet të ndjekim dhe ndryshimet që duhet të sjellim.
Fushata mbaron sonte, por angazhimi ynë për ju nuk mbaron këtu. Nesër është dita juaj – dita kur ju, me votën tuaj, do të vendosni për të ardhmen. Prandaj, ju ftoj që të dilni dhe të votoni me besim, të votoni për zhvillimin, për transparencën, për përfaqësim të ndershëm dhe të fuqishëm.
Pavarësisht rezultatit, një gjë është e sigurt: unë do të mbetem gjithmonë pranë jush, duke punuar për vendin tonë, për ju dhe për familjet tuaja. Sepse ky nuk është vetëm një premtim elektoral, por një zotim për një rrugëtim të përbashkët.
Faleminderit nga zemra për çdo mbështetje, për çdo fjalë inkurajimi dhe për besimin tuaj. Së bashku, ne mund të sjellim ndryshimin që e meritojmë!
Me shumë dashuri e respekt e juaja:
𝑨𝒋𝒍𝒊𝒏 𝑺𝒉𝒊𝒔𝒉𝒌𝒐 
