Jose Mourinho ka dalë në mbrojtje të Kylian Mbappes, duke i cilësuar si “qesharake” kritikat ndaj sulmuesit të Real Madridit për aktivitetet e tij gjatë pushimit nga angazhimet me kombëtaren e Francës.
Mbappe u tërhoq nga grumbullimi i Francës pas një lëndimi të pësuar në ndeshjen ndaj Turqisë më 25 shtator. Megjithatë, vëmendja ndaj tij u shtua pasi futbollisti publikoi fotografi nga një ngjarje e Javës së Modës në Paris dhe pamje duke ngarë biçikletën në Zvicër.
Këto veprime ngjallën diskutime, sidomos pas deklaratave të mëparshme të Mourinhos, i cili kishte bërë të ditur se nuk i lejonte lojtarët e tij të ngisnin biçikleta.
Por trajneri portugez i hodhi poshtë kritikat, duke këmbëngulur se lojtarët e Real Madridit i kishin përmbushur detyrimet e tyre gjatë pushimit ndërkombëtar.
“Kur bëhet fjalë për Real Madridin, gjithçka është ndryshe. Të gjithë lojtarët kanë bërë saktësisht atë që duhej të bënin gjatë pushimit. Pastaj, gjithmonë kërkoni të gjeni më shumë probleme dhe çështje”, deklaroi Mourinho.
Ai shtoi se nuk do të toleronte asnjë futbollist që nuk respekton rregullat dhe përgjegjësitë ndaj klubit.
“Ajo që mund t’ju premtoj është se, kur një lojtar i Real Madridit nuk sillet ashtu siç duhet dhe dështon në këtë drejtim, duke mos qenë për 24 orë lojtar i Real Madridit, nuk do ta shihni në bankinë, sepse do të jetë në shtëpi”, u shpreh trajneri.
Mourinho sqaroi gjithashtu se fotografia e Mbappes me biçikletë ishte interpretuar gabimisht. Sipas tij, biçikletat ishin në dispozicion të mysafirëve në kompleksin hotelier ku po qëndronte sulmuesi dhe përdoreshin për lëvizje të shkurtra.
I pyetur nëse mediat e kishin ekzagjeruar situatën, Mourinho ishte i drejtpërdrejtë.
“Ekzagjeruar? Jo, mendoj se ishte qesharake”, tha ai.
Trajneri shtoi se, nëse Mbappe luan në ndeshjen e radhës, kjo do të thotë se francezi nuk ka dështuar në përmbushjen e detyrimeve të tij ndaj Real Madridit.
Ndërkohë, madrilenët kanë mbetur gjashtë pikë prapa Barcelonës në tabelën e La Ligës pas shtatë ndeshjeve të zhvilluara.
Mbappe, 27-vjeçar, vazhdon të jetë një prej favoritëve për ta fituar Topin e Artë të këtij viti. Sezonin e kaluar, ai realizoi 42 gola në 44 paraqitje për klubin, por Real Madridi nuk arriti të fitojë asnjë trofe.
Sulmuesi francez gjithashtu fitoi Këpucën e Artë në Kupën e Botës me dhjetë gola, duke e çuar në 22 numrin e golave të shënuar në këtë garë gjatë karrierës së tij. Megjithatë, Franca e përfundoi turneun në vendin e katërt.
