Paris Saint-Germain po përgatit një lëvizje të madhe në merkaton e janarit dhe në qendër të vëmendjes është Julián Álvarez.
Sipas raportimit të El Nacional, kampionët francezë po planifikojnë të bëjnë një ofertë për sulmuesin argjentinas të Atlético Madridit, ndërsa transferimi është kërkuar drejtpërdrejt nga trajneri Luis Enrique.
Presidenti i PSG-së, Nasser Al-Khelaïfi, raportohet se e ka miratuar operacionin dhe klubi francez është i gatshëm të bëjë një investim të madh financiar për ta bindur Atlético Madridin të heqë dorë nga sulmuesi.
Interesimi për Álvarezin vjen në një moment të veçantë. Argjentinasi ishte në qendër të një sage të gjatë gjatë verës, pasi dëshironte të largohej nga Madridi dhe u lidh fuqishëm me një transferim te Barcelona. Megjithatë, marrëveshja nuk u realizua dhe Álvarez mbeti te Atlético, të paktën deri në janar.
Barcelona vazhdon ta ketë në objektivat e saj, por PSG dëshiron të veprojë më shpejt dhe ta fitojë garën para klubit katalanas. Parisienët synojnë fillimisht të bindin Atlético Madridin, përpara se të fokusohen te marrëveshja personale me lojtarin.
Situata nuk është e thjeshtë, pasi Atlético ka treguar gjatë verës se nuk dëshiron të negociojë lehtë për një nga lojtarët kryesorë të skuadrës. Klubi madrilen ka qenë i prerë në qëndrimin e tij për të ardhmen e Álvarezit dhe një ofertë e jashtëzakonshme financiare mund të jetë e nevojshme për ta ndryshuar këtë pozicion.
Në anën tjetër, Luis Enrique e sheh Álvarezin si një profil ideal për repartin ofensiv të PSG-së. Trajneri spanjoll sapo ka rinovuar kontratën me klubin deri në vitin 2030, çka tregon besimin e madh të drejtuesve te projekti i tij.
