Mesfushori francez Paul Pogba pritet të rikthehet si titullar për herë të parë pas katër vitesh, në përballjen që AS Monaco do ta zhvillojë ndaj FC Metz këtë fundjavë në Ligue 1.
33-vjeçari, i cili iu bashkua Monacos verën e kaluar, ka pasur rol të kufizuar këtë sezon. Ai ka regjistruar vetëm pesë paraqitje në kampionat dhe ka grumbulluar gjithsej 57 minuta lojë.
Nëse përzgjidhet nga minuta e parë, kjo do të ishte paraqitja e tij e parë si titullar që nga 16 prilli i vitit 2022, kur Paul Pogba luajti për Manchester United ndaj Norwich City në Premier League.
Monaco aktualisht është në garë për një vend që dërgon në garat evropiane dhe ka nevojë për rezultate të forta në javët e fundit të sezonit. Përballja ndaj Metz, që ndodhet në fund të tabelës, konsiderohet si një ndeshje e rëndësishme për objektivat e klubit.
Rikthimi i Pogbas në formacionin startues do të përbënte një moment të rëndësishëm në karrierën e tij, pas një periudhe të gjatë të ndikuar nga lëndimet dhe minutat e pakta në fushë, teksa synon të rigjejë ritmin dhe ndikimin e tij në nivel klubesh./04 Online
