Hetimet Rajonale në koordinim me Prokurorin e Shtetit ka zhvilluar sot një aksion në rajonin e Prizrenit, që kishte cak personat e dyshuar për përfshirje në veprat penale që lidhen me fajde, raporton Gazeta Sinjali.
Për rastin siç ka njoftuar Policia është arrestuar një person, i dyshuar për veprën penale “Fajde”.
I dyshuari ka ngarkuar viktimën me kamata mujore të cilat kalojnë shumën mbi 100 mijë euro, ka zbuluar Policia e Kosovës.
“28 vjeçari E.K me qëllim të përfitimit të kundërligjshëm të pasurisë, kontrakton një shumë dukshëm jo proporcionale të pasurisë në këmbim të dhënies së borxhit, duke shfrytëzuar gjendjen e rëndë financiare të viktimës, e ngarkon me kamata mujore viktimën, kamata të cilat e kalojnë shumën mbi 100000 (një qind mijë) euro”.
Policia bëri të ditur se gjatë operacionit policor është kontrolluar banesa e të dyshuarit në Prizren, ku edhe është arrestuar i dyshuari si dhe janë sekuestruar prova që ndërlidhen me veprën penale.
Ai pas intervistimit, me urdhër të Prokurorit është dërguar në mbajtje./Sinjali/
