Sulmuesi i Barcelona, Robert Lewandowski, konfirmoi të shtunën se do të largohet nga klubi këtë verë, në përfundim të kontratës së tij.
Sulmuesi veteran polak, 37-vjeçar, ka realizuar 119 gola në 191 ndeshje në të gjitha garat që prej transferimit nga Bayern Munich në vitin 2022.
Lewandowski ndihmoi Barcelonën të fitonte tre tituj të La Liga, përfshirë edhe atë të këtij sezoni, si dhe Copa del Rey në vitin 2025.
“Pas katër vitesh plot sfida dhe punë të madhe, ka ardhur koha për të vazhduar përpara”, shkroi Lewandowski në një postim në Instagram.
“Po largohem me ndjenjën se misioni është përmbushur. Katër sezone, tre tituj kampioni.”
Sulmuesi iu bashkua Barcelonës në një periudhë të vështirë për klubin, i cili po përballej me probleme financiare dhe mungesë suksesi, ndërsa ai kontribuoi në rikthimin e skuadrës në majën e futbollit spanjoll dhe në garën për UEFA Champions League.
“Barcelona është rikthyer aty ku e ka vendin”, vazhdoi polaku.
“Nuk do ta harroj kurrë dashurinë që mora nga tifozët që nga dita ime e parë. Katalonia është vendi im në tokë.”
Lewandowski do ta luajë ndeshjen e tij të fundit në stadiumin “Camp Nou” të dielën ndaj Real Betis.
