Rita Ora ka folur sërish për thashethemet që e lidhën atë me historinë e shumëpërfolur të tradhtisë mes Beyoncé dhe Jay-Z, pas publikimit të albumit “Lemonade” në vitin 2016.
Këngëtarja shqiptaro-britanike u përfshi atëherë në një valë spekulimesh pasi fansat nisën ta identifikonin si të ashtuquajturën “Becky with the good hair”, personazhi misterioz i përmendur në këngën “Sorry”.
Ora i ka mohuar vazhdimisht këto pretendime, ndërsa tani thotë se do të donte të mësonte kush ishte personi që e nisi gjithë historinë.
“Gjithmonë vendosin gratë kundër njëra-tjetrës”
“Nuk e di kush e nisi gjithë atë dramë me Becky-n, por do të doja shumë ta zbuloja”, tha Rita.
Ajo kritikoi mënyrën se si historia u kthye në një përplasje mes grave.
“Gjithmonë është një grua që vendoset kundër një gruaje tjetër dhe mund të jeni të sigurt se asnjëra prej nesh nuk kishte asgjë për të fituar nga kjo.”
Spekulimet kishin nisur në një periudhë delikate për Ritën, pasi ajo sapo ishte larguar nga label-i i Jay-Z dhe kishte nënshkruar një marrëveshje të re me Atlantic Records.
Në të njëjtin vit, Beyoncé publikoi “Lemonade”, album ku kishte disa referenca ndaj tradhtisë në martesën e saj.
Të brendshmet me limona dhe varësja që u interpretua si “J”
Thashethemet u përforcuan pasi Rita publikoi në Snapchat një fotografi ku mbante të brendshme me motive limoni dhe një varëse që shumë fansa menduan se kishte shkronjën “J”.
Për fansat e Beyoncé, limonët u interpretuan si një referencë e drejtpërdrejtë ndaj albumit “Lemonade”, ndërsa shkronja “J” u lidh me Jay-Z.
Rita ka këmbëngulur se gjithçka ishte rastësi.
“Oh Zot, ishte fjalë për fjalë një koincidencë. As që e mendova”, kishte deklaruar ajo më herët në një intervistë me Louis Theroux.
Sipas saj, varësja në fakt nuk kishte shkronjën “J”.
“Nuk ishte J, ishte R. E kthyen imazhin dhe pastaj dukej si J.”
Edhe fotosesioni me limona kishte tjetër shpjegim
Një tjetër fotografi që shkaktoi reagime të shumta ishte ajo ku Rita pozonte me reçipeta gjysmëtransparente të zbukuruara me motive limoni.
Por këngëtarja sqaroi se veshja ishte pjesë e bashkëpunimit të saj me markën e të brendshmeve Tezenis.
“Nuk kishte absolutisht asnjë lidhje. Ishte dizajni im me kompaninë Tezenis, me të cilën po bashkëpunoja”, kishte shpjeguar ajo.
Sipas Ritës, shumë prej interpretimeve që u krijuan në rrjetet sociale duhej të merreshin “me një dozë skepticizmi”.
Shenja “Not Becky” e Katy Perry
Spekulimet u shtuan edhe më shumë pasi Rita u pa në një festë pas Met Gala me një distinktiv ku shkruhej “Not Becky”.
Por edhe për këtë ajo dha një shpjegim.
Rita tha se distinktivin ia kishte dhënë mikja e saj Katy Perry si një shaka.
“Katy Perry, një mike e imja shumë e mirë, më dha një distinktiv qesharak ku shkruhej ‘Not Becky’.”
Selfie me Beyoncé për t’i dhënë fund spekulimeve
Më vonë gjatë atij viti, Rita dhe Beyoncé realizuan një selfie së bashku, të cilën Ora e publikoi me mbishkrimin “Family”.
Fotografia u interpretua si një mënyrë për të treguar se mes dy artisteve nuk ekzistonte asnjë konflikt.
Duke reflektuar mbi atë periudhë, Rita tha se rrjetet sociale në vitin 2016 ishin ende një fenomen relativisht i ri dhe se një histori mund të përhapej papritur në përmasa globale.
“Është e lehtë ta harrosh, por dhjetë vjet më parë rrjetet sociale ishin ende diçka mjaft e re. Mund të merreshe me punët e tua dhe një mëngjes të zgjoheshe duke kuptuar se e gjithë bota po merrej me ty.”
Rita: Nuk do të flas negativisht për Jay-Z
Pavarësisht largimit nga label-i i tij, Rita theksoi se nuk ka ndërmend të flasë negativisht për Jay-Z.
“Nuk do të jem kurrë negative ndaj Jay-Z, sepse ai është një artist legjendar”, tha ajo.
Megjithatë, përvoja i kishte dhënë një mësim të rëndësishëm.
“Kur e ndien se jeta jote po të tërheq në një drejtim ku nuk dëshiron të shkosh, duhet të jesh gati të largohesh.”
“Ndonjëherë duket sikur vetëm jeta ime private ka rëndësi”
Rita ka pranuar se vazhdimisht është ndier e frustruar nga fokusi i madh i mediave te jeta e saj private.
“Më duket interesante që njerëzit janë kaq shumë të interesuar për jetën time personale, sikur çdo gjë tjetër që kam bërë nuk është mjaftueshëm e vlefshme”, ka thënë ajo.
Sipas këngëtares, kjo mund të jetë zhgënjyese, pasi ajo dëshiron që puna dhe arritjet e saj muzikore të marrin po aq vëmendje.
Edhe në vitin 2016, kur spekulimet për “Becky” ishin në kulmin e tyre, Rita reagoi publikisht duke i cilësuar ato si fyese.
“Më duket jashtëzakonisht e pasjellshme dhe mosrespektuese ndaj grave në përgjithësi kur akuzohemi për diçka që largon vëmendjen nga ajo që është më e rëndësishme – muzika.”
Një dekadë më vonë, Rita Ora vazhdon të mohojë kategorikisht se kishte ndonjë lidhje me personazhin misterioz të “Becky” dhe thotë se pyetja që i ka mbetur ende pa përgjigje është vetëm një: kush e nisi gjithë atë histori? /GazetaExpress/
