Vetëm një ditë pas propozimit për martesë që mori vëmendje të madhe në ekran, Aurora Rrusta dhe Kushtrim Kelani kanë bërë një tjetër hap të rëndësishëm drejt martesës.
Në ditëlindjen e 23-të të Aurorës, Kushtrimi ka shkuar së bashku me familjarët e tij për t’ia kërkuar zyrtarisht dorën partneres, duke respektuar traditën shqiptare.
Aurora ka ndarë në Instagram pamje nga ceremonia familjare, krahas të cilave ka shkruar: “Siç e do tradita”, duke shënuar edhe datën 08.09.2026.
Një ditë më parë erdhi propozimi në studio
Ky zhvillim vjen vetëm një ditë pasi Kushtrimi e surprizoi Aurorën gjatë transmetimit të drejtpërdrejtë të emisionit “Ora 7” në Klan Kosova.
Teksa Aurora po prezantonte parashikimin e motit, Kushtrimi u shfaq papritur në studio me unazën e fejesës dhe i kërkoi të martohej me të.
Aurora e pranoi propozimin, duke krijuar një nga momentet më të veçanta të emisionit.
Kushtrimi kishte treguar se kishte zgjedhur pikërisht ambientet e Klan Kosovës për propozimin, pasi një pjesë e rëndësishme e historisë së tyre kishte nisur aty.
Lidhja nisi në “Big Brother VIP Kosova 4”
Aurora Rrusta dhe Kushtrim Kelani u njohën gjatë pjesëmarrjes në “Big Brother VIP Kosova 4”, ku mes tyre nisi edhe afrimiteti.
Pas përfundimit të eksperiencës në reality show, dyshja vazhdoi lidhjen edhe jashtë shtëpisë.
Marrëdhënia e tyre është ndjekur me interes nga publiku dhe në javët e fundit është raportuar se çifti po përgatitet për martesë.
Dasma pritet në fillim të tetorit
“Prive By Liberta Spahiu” kishte raportuar më herët se Aurora dhe Kushtrimi po planifikojnë ta kurorëzojnë lidhjen e tyre me martesë dhe se dasma pritet të mbahet në fillim të muajit tetor.
Ceremonia pritet të organizohet duke respektuar edhe elemente të traditës shqiptare.
Pas propozimit publik dhe vizitës së familjes së Kushtrimit për t’ia kërkuar dorën Aurorës, përgatitjet për ditën e madhe tashmë duket se kanë hyrë në fazën përfundimtare.
