Miratohet projektligji për paga, Qeveria kthen pagat në drejtësi sikur para rritjes

0
724

Qeveria e Kosovës të mërkurën ka vendosur t’i kthejë pagat e gjyqtarëve dhe prokurorëve, sikur para rritjes që ishte bërë me vendim të Qeverisë Haradinaj në vitin 2017.

Qeveria Haradinaj në fund të vitit 2017 kishte marrë vendim për rritjen e pagës të kryeministrit të asaj kohe, Ramush Haradinaj, e cila preku automatikisht edhe sistemin e drejtësisë. Më pas në kohën e Qeverisë Kurti 1 ishte marrë vendim që paga e kryeministrit të zbritej, por ato të drejtësisë nuk u preken.

Me miratimin e Qeverisë sot, pagat e gjyqtarëve dhe prokurorëve kthehen sikur para vendimit të vitit 2017 të marrë nga Qeveria Haradinaj.

“Kushti i paraparë për përjashtim të këtij ligji është plotësuar me nxjerrjen e aktgjykimit nga Gjykata Kushtetuese me ligjin e atëhershëm për paga, rrjedhimisht për të sjellë ligjshmëri plotësojmë këtë vendim duke shfuqizuar nenet relevante”, ka thënë Kurti në mbledhjen e 109-të të Qeverisë.

Vendimi i së mërkurës i parapriu projektligjit për pagat në sektorin publik. Në draftligjin e publikuar ishte sektori i drejtësisë i vetmi që prekej me ulje të pagës. Ishte paralajmëruar se pikërisht ky sektor mund ta çojë në Gjykatën Kushtetuese ligjin.

Kurti u shpreh se me këtë projektligj po krijojnë për herë të parë një sistem të unifikuar të pagave, që sipas tij, nuk do të ketë dallime të mëdha siç kishte më parë.

“Ky projektligj po krijon sistemin e unifikuar të pagave. Ky sistem ka për qëllim të rregullojë pagën për të gjithë ata që paguhen nga shteti. Ne jemi përpjekur t’i zvogëlojmë dallimet mes pagave që merren në sektorin publik, nga 20 herë sa ishte më parë, në 4.78 herë. Pagat e kreut të shtetit është pesë herë më e madhe se zyrtari më i thjeshtë që merr pagë nga shteti”, ka thënë ai.

Ekzekutivi miratoi edhe projektligjin për zyrtarët publikë./Koha

Leave a Reply