Arsenali ka vendosur një çmim prej rreth 45 milionë paundësh për Myles Lewis-Skelly, ndërsa Manchester United dhe Chelsea kanë shfaqur interesim për talentin anglez.
Sipas raportimeve, të dy klubet kanë marrë informacion për mundësinë e transferimit të 19-vjeçarit, i cili mund të luajë si mbrojtës i majtë, por edhe në mesfushë.
Lewis-Skelly ka pasur hapësira të kufizuara në formacionin e Arsenalit sezonin e kaluar, duke bërë vetëm pesë startime në kampionat. Në hierarki përpara tij janë Riccardo Calafiori dhe Piero Hincapie, ndërsa në mesfushë konkurron me Declan Rice, Martin Zubimendi dhe Mikel Merino, shkruan 04 Online.
Ndërkohë, ish-mbrojtësi i Arsenalit, Lee Dixon, ka sugjeruar një shkëmbim të mundshëm mes Lewis-Skelly dhe Marcus Rashford.
“Do t’i shkëmbeja ata (Myles Lewis-Skelly dhe Marcus Rashford)? E dini çfarë, ndoshta po,” tha Dixon për “BestBettingSites”, sipas “Tribal Football”.
“Dhe kjo nuk ka të bëjë me diçka kundër Myles Lewis-Skelly, por me dhënien e lirisë për të shkuar dhe për ta zgjeruar lojën e tij diku tjetër.
“Sa i përket Marcus Rashford, ai është një lojtar që ka nevojë për dikë që ta mbështesë dhe Arteta do të ishte i shkëlqyer për të.
“Jepi atë dashuri, jepi lirinë për të luajtur në krahun e majtë dhe po, do të doja ta shihja me fanellën e Arsenalit. Kam rezervat e mia nëse ai është vazhdimisht një lojtar i nivelit botëror, por duke parë atë që Arsenali ka në skuadër tani, ai do të ishte një përforcim i mirë”./04 Online/
