Presidentja në detyrë, Albulena Haxhiu, ka bërë të ditur se i ka dorëzuar Zejnullah Gashit dekretin për emërimin në detyrën e Kryeprokurorit të Shtetit.
Sipas saj, vendimi është marrë pas pranimit të propozimit nga Këshilli Prokurorial i Kosovës dhe shqyrtimit të dokumentacionit, përfshirë informacionet nga institucionet kompetente të sigurisë dhe raportet e monitorimit të procesit të përzgjedhjes.
Haxhiu tha se ka vepruar në përputhje me përgjegjësitë kushtetuese dhe ligjore, duke marrë parasysh rëndësinë e funksionit.
Ajo i uroi Gashit sukses në detyrë dhe theksoi se pret që ai ta ushtrojë funksionin me integritet, paanshmëri dhe përkushtim ndaj sundimit të ligjit.
Postimi i plotë:
Sot prita në takim z. Zejnulla Gashi, të cilit i dorëzova dekretin për emërimin në detyrën e Kryeprokurorit të Shtetit.
Pas pranimit të propozimit dhe dokumentacionit nga Këshilli Prokurorial i Kosovës, është bërë një shqyrtim i kujdesshëm dhe gjithëpërfshirës i materialeve të dorëzuara, duke përfshirë po ashtu informacionet relevante të siguruara nga institucionet kompetente të sigurisë dhe raportet e organizatave që kanë monitoruar procesin e përzgjedhjes. Marrë parasysh rëndësinë e këtij funksioni dhe nevojën për funksionalizimin e plotë të institucioneve të drejtësisë, kam vepruar në përputhje me përgjegjësitë kushtetuese dhe ligjore.
I urova z. Gashi suksese në ushtrimin e kësaj përgjegjësie të lartë shtetërore. Funksioni i Kryeprokurorit të Shtetit është një nga shtyllat kryesore të sundimit të ligjit dhe mbrojtjes së rendit kushtetues.
Beteja kundër krimit të organizuar, korrupsionit, ndjekja e kriminelëve të luftës, dhunuesve dhe krimit të çfarëdo forme duhet të marrin përgjigje të prerë nga organi i akuzës.
Pres që Kryeprokurori Gashi, këtë detyrë ta ushtrojë me integritet të lartë profesional e moral, paanshmëri e guxim gjithnjë me përkushtim të lartë ndaj shtetit, qytetarëve, në përputhje me Kushtetutën dhe ligjet e Republikës sonë.
