Lëvizja VETËVENDOSJE! – Qendra në Prizren sot ka mbajtur konferencë të jashtëzakonshme për media lidhur me shkeljet dhe parregullsitë në konkursin e fundit për sekretarë të shkollave fillore dhe të mesme në Komunën e Prizrenit, thuhet në komunikatën për media nga ana e LVV-së.
“Me këtë rast, shefi i grupit parlamentar të Lëvizjes Vetëvendosje! në Kuvendin e Prizrenit, Karanfil Haxhillari dhe anëtari i Komisionit për Arsim Faruk Tahiri, duke u bërë thirrje kandidatëve që të parashtrojnë ankesa dhe të mos dorëzohen karshi këtij procesi të montuar, kanë ftuar organet e rendit që t’i fillojnë hetimet në mënyrë që që të ndalohet ky degradim politik që po i bëhet institucioneve arsimore të Komunës së Prizrenit.
Gjatë fjalës së tij, shefi i grupit parlamentar të Lëvizjes Vetëvendosje! në Kuvendin e Prizrenit, Karanfil Haxhillari ka thënë se pas katandisjes së shkollave me drejtorë puro politik, për, përkundër premtimeve përkatësisht rrenave gjatë fushatës zgjedhore, gjoja de-politizimin e arsimit në komunën tonë, pra përveç drejtorëve, kjo qeverisje e PDK-së vazhdoi përmes trikave të njohura nga incizimet, përmbushjen e pazareve politike duke e politizuar edhe me sekretarë të shkollave.
Tutje, Haxhillari ka numëruar një nga një të gjitha shkeljet ligjore në lidhje me konkursin në fjalë.
“Ne kemi gjetur shumë shkelje ligjore sa i përket këtij konkursi. Po fillojmë me Komisionin përzgjedhës
1. Ligji Nr. 06/L -114 për Zyrtarët Publikë neni 68, paragrafi 7 thotë: Komisioni i përzgjedhjes është ad-hoc, themelohet nga organi emërtues dhe përbëhet nga të paktën 5 persona, ku të paktën tre (3) prej tyre janë profesionistë të fushës në të cilën bëhet vlerësimi i kandidatëve, një (1) është profesionist në fushën e përzgjedhjes të burimeve njerëzore dhe një (1) tjetër është përfaqësues i NJBNJ (Njësisë e burimeve njerëzore). Komisioni i përzgjedhjes themelohet për çdo grup apo pozitë për të cilën zhvillohet konkurrimi.
Kryetari i Komisionit Fatmir Badalli, i transferuar me procedurën e lëvizjes Brenda kategorisë në NJBNJ (Njësinë e Burimeve Njerëzore) sipas informacioneve të cilat i kemi, personi në fjalë deri me datën 29 ka punuar si staf civil në administratën e policisë, kur edhe bëhet njoftimi për lëvizje brenda kategorisë me datë 30 emërohet kryesues i komisionit përzgjedhës.
Kjo e bën shumë dyshues përzgjedhjen e tij si dhe shtrohet pyetja sa është ekspert apo profesionistë në fushën e përzgjedhjes?
Si dhe anëtarja tjetër e Komisionit si përfaqësuese e Burimeve Njerëzore, Shkendije Berisha.
Sipas informacioneve që i kemi, Shkendije Berisha është e punësuar në qershor të vitit 2022, e që bie ndesh me Rregulloren Nr 16/2020 PËR PRANIMIN DHE KARRIERËN NË SHËRBIMIN CIVIL TË REPUBLIKËS SË KOSOVËS respektivisht neni 32 paragrafi 1 i cili thotë: nëpunësi që emërohet sipas nenit 30 të kësaj Rregulloreje, i nënshtrohet një periudhe pune provuese që zgjat një (1) vit nga data e fillimit të punës. Paragrafi 2 i cili thotë: puna provuese është përgatitja teorike dhe praktike e nëpunësit për kryerjen me sukses të detyrave të pozitës ku është emëruar.
Si dhe neni 34 paragrafi 1 i cili thotë: gjatë periudhës të punës provuese nëpunësi civil, i sapo emëruar, ushtron detyrën nën kujdesin e një nëpunësi civil ekzistues, të caktuar si mentor dhe është i detyruar të ndjekë udhëzimet e tij.
Tani shtrohet pyetje legjitime, si ka mundësi që një punëtore në Njësinë e Burimeve Njerëzore, nën mbikëqyrje dhe punë provuese njëvjeçare , të emërohet anëtare e Komisionit përzgjedhës?
Si përfundim del që Komisioni për përzgjedhjen e sekretarëve të Shkollave është në kundërshtim me ligjet e rregulloret e lartcekura.”, ka thënë Haxhillari.
Po ashtu, gjatë fjalimit të tij, ai ka numëruar edhe dyshimet e Lëvizjes VETËVENDOSJE!, për shkeljet edhe në procedurë të Konkursit.
“1. LIGJI NR. 06/L – 114 PËR ZYRTARËT PUBLIKË neni 68 procedura e konkurrimit paragrafi 3 i cili thotë Konkurrimi zhvillohet në këto dy faza: 3.1. verifikimi paraprak, nëse kandidatët i plotësojnë kriteret e përgjithshme dhe ato të posaçme, sipas shpalljes së konkurrimit;
3.2. vlerësimi i njohurive, aftësive dhe cilësive profesionale të kandidatëve. 4. Verifikimi paraprak kryhet nga NJBNJ, ndërsa vlerësimi i kandidatëve bëhet nga Komisioni i përzgjedhjes (në vijim: Komisioni).
Nga informatat të cilat i kemi, verifikimi paraprak nuk është kryer nga NJBNJ siç përcaktohet me ligj, por nga Komisioni i përzgjedhjes.
Gjatë intervistës me gojë, Komisioni nuk i ka pasur formularët standarde të poentimit të cilët mundësojnë dhënien e pikëve aty për aty në mënyrë që vlerësimi dhe përzgjedhja të jetë transparente edhe për vet anëtarët e komisionit, por pikëzimi i tyre ka qenë privat në fletore të tyre.
Pikëzimi në formularët standarde, është bërë pas kthimit në punë nga pushimet e vitit të ri.
Disa anëtarë të komisionit, dikujt ia kanë bërë nga dy pyetje e dikujt tjetër nga një (kjo vë në dyshim si e kanë bërë vlerësimin me pikë dhe krahasimin me kandidatin tjetër).
Shefi i personelit pas çdo interviste ka hyrë në sallë dhe ka kërkuar që komisioni të jetë në nivel të punës duke bërë presion që procesi kinse të shkoj mirë. E çfarë trika janë përdorur, rezultati final tregon qartë. Po ashtu vazhdimisht i ka nxjerrë anëtarët e komisionit jashtë madje edhe gjatë kohës kur kandidatët ishin në intervistë!
Gjithashtu, intervistat kanë filluar pa prezencë të monitoruesve të sindikatës së punës!”, u shpreh Haxhillari.
Ai, në emër të Lëvizjes VETËVENDOSJE! Qendra në Prizren, u bëri thirrje kandidatëve të parashtrojnë ankesa dhe të mos dorëzohen karshi këtij procesi të montuar, së bashku t’i shkojnë deri në fund këtyre parregullsive duke i përdorur të gjitha dispozitat ligjore.
Duke i bërë thirrje organeve të rendit që t’i fillojnë hetimet në mënyrë që të ndalohet ky degradim politik që po i bëhet institucioneve arsimore të Komunës së Prizrenit, Haxhillari, ftoi kryetarin Shaqir Totaj që ta anuloj këtë konkurs dhe të merr masa ndaj shefit të personelit i cili e ka vënë në lajthitje ku kryetari emëron kundërligjshëm Komisionin.
Nga ana tjetër, kryetari i Komisionit për Arsim, njëherësh edhe kuvendari i Lëvizjes VETËVENDOSJE! në Prizren, Faruk Tahiri ka thënë se Shaqir Totaj i cili për 4 vite sa ishte në opozitë, në vazhdimësi kishte kritikuar qeverisjen e kaluar për nepotizëm e politizim të Arsimit, kurse sot pas një viti qeverisje, Tahiri ka deklaruar se po e shohin se reagimet e atëhershme kanë qenë vetëm fjalë për të ardhur në pushtet e jo për ta ngritur cilësinë dhe profesionalizmin në Arsim.
“Edhe çka duhet të bëhet për ta thyer shpresën e rinisë në këtë vend?
Edhe çka duhet të bëhet për ta humbur durimin e shoqërisë sonë?
Jemi të vetëdijshëm që asnjë konkurs nuk do t’i plotësoj pritjet e konkurruesve sepse punësimi në krahasim me aplikimet është i kufizuar
Por pyetja ime është për Kryetarin Totaj, çka duhet të bëhet që në një konkurs të mbizotëroj meritokraci, kush humb me punësimin e më meritoreve.
A nuk kemi ndërmend të trashëgojmë ndonjë gjë me vlerë, apo jemi të vendosur ta shkatërrojmë të ardhmen tonë.”, u shpreh Tahiri.
Duke i bërë thirrje kryetarit Totaj për anulimin e konkursit, ka thënë se qeverisja e PDK-së në Prizren, për hir të pazareve të saj ka shkelur djersën e të rinjve të cilët pas përfundimit të shkollimit me të drejt presin të japin kontributin e tyre në shoqëri.
“Kryetar Totaj, anuloni konkursin edhe pse do të thirreni se nuk e keni shkelur ligjin, por me veprimin e fundit e keni degraduar edhe institucionin e Kuvendit, pazaret për mbështetje bëni me partnerë duke i emëruar drejtor të drejtorive të caktuar e jo duke e shkelur djersën e të rinjve të cilët pas përfundimit të shkollimit me të drejt presin të japin kontributin e tyre në shoqëri”, ka thënë Tahiri.
Në fund, duke iu drejtuar kryetarit Totaj, Tahiri ka deklaruar se:
“Nëse do të mburresh me profesionalizëm dhe efikasitetin e treguar për një vit sa jeni në krye të komunës andaj me keqardhje ju them se rahatimi i familjarëve dhe individëve me librezë partiake në pozita të ndryshme në Komunë është suksesi i juaj i vetëm deri më tash.”, u shpreh Tahiri”, thuhet në komunikatë./04 Online
