Galatasaray siguroi titullin e kampionit në Superligën turke pas fitores bindëse 3:0 ndaj Kayserispor, mbrëmë në “RAMS Park”. Portieri legjendar Fernando Muslera ishte në qendër të vëmendjes, pasi realizoi golin e tretë nga penalltia në minutën e 89-të, në një moment festiv për ekipin stambollas, shkruan 04 Online.
Ky veprim i rrallë e emocionues i Musleras erdhi si një përshëndetje simbolike me tifozët, pasi në fund të këtij sezoni ai pritet të largohet nga klubi, pas 14 vjetësh të lavdishme.
Me këtë fitore, Galatasaray u ngjit në kuotën e 89 pikëve pas 34 ndeshjesh, duke mbajtur një distancë prej tetë pikësh ndaj rivalit Fenerbahçe të drejtuar nga Jose Mourinho, me vetëm dy ndeshje të mbetura në sezon.
Ky nuk ishte goli i parë i Musleras për Galatasarayn — ai kishte shënuar gjithashtu nga penalltia në vitin 2012 kundër Manisasporit, në ndeshjen e fundit të sezonit të tij të parë me klubin turk.
Muslera largohet nga Stambolli si një ikonë e klubit, me titullin kampion dhe një gol për t’u mbajtur mend./04 Online
