Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri ka thënë se ai bashkë me shefin e Grupit Parlamentar të LDK-së, Arben Gashi dhe raportuesen për Kosovën në Këshillin e Evropës, Dora Bakojanis, janë takuar me EPP/CD, i cili është një nga grupet më të mëdha politike në Asamblenë Parlamentare të Këshillit të Evropës (APKiE) me anëtarë nga më shumë se 40 shtete anëtare.
Sipas Tahirit, takimi u përmbyll me një diskutim të hapur mbi aplikimin e Kosovës në Këshillin e Evropës.
“Raportuesja znj. Dora Bakojanis prezantoi gjetjet kryesore të raportit. Ne, delegacioni i Kosovës e falënderuam për punën e madhe dhe qasjen e paanshme dhe profesionale në këtë detyrë sfiduese”< ka shkruar Tahiri në X.
Debati për kërkesën e Kosovës për anëtarësim në Këshillin e Evropës dhe votimi i draft opinionit do të jenë ndër pikat më të rëndësishme të seancës pranverore të Asamblesë Parlamentare të Këshillit të Evropës (APKE), e cila fillon sot në Strasburg dhe do të zgjasë deri më 19 prill.
Më 27 mars, Komisioni Politik i PSSE-së ka miratuar draft-Opinionin për kërkesën e Kosovës për anëtarësim në Këshillin e Evropës, të cilin ky organ do ta deklarojë nesër, më 16 prill, në seancën plenare.
Ndër temat e tjera, gjatë seancës së PSSE-së, do të zhvillohet një debat i përbashkët për “vdekjen e Alexei Navalny dhe nevojën për të kundërshtuar regjimin totalitar të Vladimir Putin dhe luftën e tij kundër demokracisë”.
PSSE do të diskutojë mbështetjen për rindërtimin e Ukrainës, duke përfshirë një propozim për përdorimin e aseteve shtetërore të ngrira ruse për këtë qëllim, me pjesëmarrjen e Kryetarit të Rada Verkhovna (Parlamenti) i Ukrainës, Ruslan Stefanchuk.
U kërkua një debat urgjent në lidhje me “projekt Konventën Kornizë për Inteligjencën Artificiale, të Drejtat e Njeriut, Demokracinë dhe Shtetin e Ligjit”.
Do të ketë gjithashtu një debat për “rolin e Këshillit të Evropës në parandalimin e fatkeqësisë humanitare në Gaza”.
PSSE do të diskutojë gjithashtu mbrojtjen e fëmijëve nga dhuna në internet dhe do të zhvillojë një debat të përbashkët mbi marrëdhëniet midis mazhorancës dhe opozitës në një shtet demokratik dhe mbi praktikat e mira në referendume.
Thuhet se rendi i ditës do të përcaktohet në ditën e parë të seancës.
