Një rast i trishtë ka ndodhur mbrëmë në lagjen Dardania të Prizrenit, ku një vajzë e moshës 25-vjeçare po dyshohet se u keqtrajtua seksualisht për orë të tëra, raporton Gazeta Sinjali. Viktima, e cila erdhi nga Zvicra për pushime, dyshohet se u dhunua dhe u sulmua në një veturë, nga i dyshuari Gj.K., 32-vjeçar.
Burimet nga Prokuroria kanë bërë me dije se ngjarja ka ndodhur gjatë mesnatës, kur edhe Policia mori informacionet se një vajzë po sulmohet fizikisht në një automjet në këtë lagje. Njësitet policore janë vënë menjëherë në veprim dhe kanë kapur në flagrancë të dyshuarin.
Sipas informatave të para, zyrtarët policorë e gjetën atë duke e rrahur viktimën, me të cilën dyshohet se edhe ka abuzuar seksualisht për rreth 3 orë.
I dyshuari është shoqëruar menjëherë në stacion policor për t’u intervistuar në lidhje me rastin, ndërkohë që automjeti i tij është sekuestruar, si provë në lidhje me rastin.
Prokurori i Shtetit ka urdhëruar ndalimin e tij për 48 orë, në dyshimet për veprën penale “dhunim”, ndërsa vajza është dërguar në spital për t’i bërë ekzaminimet e nevojshme mjekësore.
