Real Madrid nuk kanë pasur përgatitjet më të mira për sezonin 2025-26 për shkak të angazhimit të tyre në Kupën e Botës për Klube. Për më tepër, ata aktualisht janë pa shërbimet e Ferland Mendy, Eduardo Camavinga, Jude Bellingham dhe Endrick Felipe për shkak të dëmtimeve, megjithatë ka lajme pozitive për rikuperimin e këtij të fundit.
Disa ditë pas përfundimit të pjesëmarrjes së Real Madrid në Kupën e Botës për Klube, u konfirmua se Endrick kishte pësuar një pengesë të re dëmtimi, pasi sapo kishte rikuperuar nga një problem i mëparshëm për të marrë pjesë në fazat e fundit të turneut. Shpresohej që ai të rikthehej në tetor, por gjërat duken më premtuese tani.
Sipas Diario AS, Endrick ka përshpejtuar rikuperimin e tij dhe ka filluar tashmë stërvitjen në fushë te Valdebebas. Ai tani synon të rikthehet nga dëmtimi pas pushimit ndërkombëtar të muajit të ardhshëm.
Endrick, i cili u konfirmua si numri nëntë i ri i Real Madrid vetëm dy javë më parë, kishte qenë i lidhur me një largim të përkohshëm nga Santiago Bernabeu më herët gjatë verës, por do të qëndrojë me skuadrën e Xabi Alonos për sezonin 2025-26. Megjithatë, ai do të ketë një betejë të madhe për minuta të rregullta, pasi do të konkurrojë me Kylian Mbappe dhe Gonzalo Garcia për pozicionin e numrit nëntë.
Nga një perspektivë individuale, është e rëndësishme që Endrick të rikthehet më shpejt se sa pritej – jo vetëm për Real Madrid, por edhe për Brazilin. 19-vjeçari synon të përfshihet në listën e Selecao për Kupën e Botës 2026 dhe për këtë duhet të luajë rregullisht. Për t’i dhënë vetes shansin më të mirë, ai gjithashtu synon të thirret nga Carlo Ancelotti për dritaret ndërkombëtare të tetorit dhe nëntorit./Express
