Sot, në Lagjen e Trimave (Tusus) në Prizren, është vënë gurëthemeli i Qendrës së re të Mjekësisë Familjare (QMF), një investim i Drejtorisë së Shëndetësisë, që ka për qëllim përmirësimin e shërbimeve shëndetësore dhe ofrimin e mundësive më të mira për kujdesin mjekësor të banorëve të kësaj lagjeje dhe zonave përreth, thuhet në njoftimin e Komunës së Prizrenit.
“QMF-ja do të ndërtohet me sipërfaqe prej 1.200 metrash katrorë dhe do të ofrojë një gamë të gjerë shërbimesh shëndetësore, duke përfshirë:
– Kontrollin dhe mbikëqyrjen mjekësore për banorët e zonës,
– Shërbimin e laboratorit, për analiza dhe diagnostikim më të shpejtë,
– Departamentin e stomatologjisë, për shërbime dentare cilësore,
– Kabinetin e radiologjisë dhe rëntgenin, për shërbime diagnostikuese të avancuara,
– Shërbimet e vaksinimit, për ruajtjen e shëndetit publik dhe parandalimin e sëmundjeve.
Me këtë investim, Komuna e Prizrenit po angazhohet për përmirësimin e infrastrukturës shëndetësore dhe ofrimin e shërbimeve cilësore për të gjithë qytetarët, duke u mundësuar atyre qasje të lehtë dhe efikase në kujdesin mjekësor.
Në ceremoninë e përurimit morën pjesë nënkryetari i Komunës së Prizrenit, Kujtim Gashi, drejtori i Shëndetësisë, Simir Krasniqi, zyrtarë komunalë, mjekë e infermierë dhe qytetarë, të cilët shprehën kënaqësinë për këtë investim që do të sjellë përfitime të drejtpërdrejta për shëndetin dhe mirëqenien e komunitetit.
Komuna e Prizrenit po vazhdon me përpjekjet për përmirësimin e shërbimeve publike dhe rritjen e cilësisë së jetesës për qytetarët e saj”, thuhet në njoftim./04 Online
