Albin Kurti do të jetë kandidati i Vetëvendosjes për kryeministër edhe në zgjedhjet e 9 shkurtit të vitit të ardhshëm. Në mbledhjen e Këshillit të Përgjithshëm të kësaj partie, të gjithë votuan pro, që Vetëvendosja të garojë me Kurtin si kandidat për kryeministër. E, ai tha se Qeveria që udhëhoqi ishte më e suksesshmja që ka pasur vendi
Këshilli i Përgjithshëm i Lëvizjes Vetëvendosje e ka përzgjedhur Albin Kurtin, si kandidatin e kësaj partie për kryeministër në zgjedhjet e 9 shkurtit.
Mbledhja e 57-të e Këshillit të Vetëvendosjes, nisi të dielën me intonimin e himnit kombëtar.
E, në ngjarjen ku anëtarët e Vetëvendosjes u mblodhën për ta nominuar kandidatin e tyre për kryeministër të Kosovës, mungoi himni shtetëror.
Nënkryetari i Vetëvendosjes, Glauk Konjufca, njëherësh edhe kryetar i Kuvendit të Kosovës, Kurtit i thuri lavde të shumta.
“Kush nga ne është më meritori, kush nga ne është më i përgatituri, po më i devotshmi kush është? Ne e kemi gjetur kush është, më lejoni që para jush ta prezantoj Albin Kurtin, kryeministrin e tashëm, por edhe të ardhshëm”, ka thënë Konjufca.
Nominimin e Kurtit nga partia nuk e kundërshtoi askush, të gjithë votuan pro. Ai nuk pati as kundërkandidat.
Pas kësaj, Nagavci e shpalli të mbyllur për medie tubimin, por harroi që fjalën t’ia japë Kurtit.
Më pas, ministrja tërhoqi fjalët dhe në skenë doli Kurti.
Kurti u shpreh se Qeveria që ai udhëheq ishte më e mira që ka pasur Kosova, pasi sipas tij, ndali korrupsionin, përmirësoi sigurinë dhe mirëqenien sociale.
“Kosova më në fund ka një qeveri, e cila u shërben të gjithë qytetarëve njësoj, e jo interesave të ngushta të pushtetarëve apo oligarkëve. Kemi udhëheqësi që lufton korrupsionin kudo që gjendet dhe rritjen e ekonomisë dhe të buxhetit e shpërndan te të gjithë qytetarët. Për dallim nga ata para nesh që ishin vetë përfituesit më të mëdhenj nga buxheti i shtetit. Kemi një shtet që ka arritur ta shtrijë sovranitetin e Republikës në çdo cep të territorit”, ka thënë Kurti.
Ai foli edhe për gjasat e partive opozitare në zgjedhjet parlamentare të 9 shkurtit.
“Pragu për partitë e tjera është 5 për qind, për VV-në, 50 për qind”, ka thënë ai.
Kurti kritika pati edhe për mediet. Tha se pavarësisht të arriturave të Qeverisë që drejton, kritikat nga to nuk mungojnë.
E pas fjalës së Kurtit, mbledhja shkoi në pauzë për 20 minuta, për të vazhduar e mbyllur për mediet.
