Shkencëtarët po shënojnë përparime të mëdha në zhvillimin e vaksinave kundër kancerit. Deri tani këto vaksina kanë qenë të kufizuara vetëm për disa lloje të caktuara tumoresh, por një studim i ri hap mundësinë për një vaksinë universale, që mund të luftojë një gamë më të gjerë kanceresh.
Ekipi i Universitetit të Floridës ka fokusuar studimin në “zgjimin” e sistemit imunitar, në mënyrë që ai të reagojë edhe ndaj qelizave kancerogjene që zakonisht i shpëtojnë mbrojtjes natyrale të trupit.
“Çfarë zbuluam është se duke përdorur një vaksinë që nuk synon drejtpërdrejt kancerin, por stimulon reagim të fortë imunitar, ne arritëm të nxjerrim reagim shumë të fuqishëm kundër kancerit. Kjo ka potencial të përdoret gjerësisht tek pacientët, madje ndoshta edhe si një vaksinë e gatshme për të gjithë”, ka thënë neuroshkencëtari Duane Mitchell.
Vaksina bazohet në mRNA, e cila prodhon proteina sinjalizuese që nxisin reagim të fuqishëm të sistemit imunitar, duke e bërë indin kancerogjen më të prekshëm ndaj sulmit, ka raportuar Science Alert.
Kjo qasje funksionon si alarm universal për “rojet kufitare” të trupit, duke krijuar mundësi për përdorim të gjerë.
Një komponent i dytë i trajtimit përfshin ilaçe të njohura kundër kancerit, të quajtura inhibitorë të kontrollit imunitar (ICIs), të cilat heqin “frenat” e sistemit imunitar dhe e bëjnë atë më efektiv.
Në kombinim me vaksinën, efektet ishin të jashtëzakonshme: te minjtë me tumore rezistente, reagimi ishte i fuqishëm dhe në disa raste tumoret u zhdukën plotësisht.
“Kjo është një provë koncepti që këto vaksina potencialisht mund të komercializohen si vaksina universale kundër kancerit, duke e bërë më të ndjeshëm sistemin imunitar ndaj tumorit individual të pacientit”, ka theksuar onkologu Elias Sayour.
Edhe pse rezultatet janë shumë premtuese, studimet te njerëzit ende nuk kanë nisur.
Studiuesit po përgatisin formula të reja të vaksinës mRNA dhe planifikojnë testime klinike, për të parë jo vetëm efektin në trajtimin e kancerit ekzistues, por edhe në parandalimin e rikthimit të tij.
“Vaksina mund të jetë një mënyrë universale për të ‘zgjuar’ sistemin imunitar të pacientit ndaj kancerit. Dhe kjo do të ishte një arritje e jashtëzakonshme, nëse provohet tek njerëzit”, ka thënë Mitchell.
Studimi është publikuar në revistën Nature Biomedical Engineering.
