Presidenti i SHBA-së, Donald Trump, tha se udhëheqësit e rinj të Iranit “duan të flasin” dhe se ai ka rënë dakord për negociata.
Trump ia tha këtë gazetarit të The Atlantic ndërsa sulmet amerikane dhe izraelite ndaj Iranit janë duke vazhduar, raporton The Atlantic.
“Ata duan të flasin dhe unë pranova të flas, kështu që do të flas me ta. Duhet ta kishin bërë më herët. Duhet të kishin rënë dakord për diçka shumë praktike dhe të thjeshtë më herët. Pritën shumë gjatë”, tha Trump.
I pyetur nga gazetari Michael Scherer se kur do të zhvilloheshin bisedimet, presidenti nuk pranoi të jepte një përgjigje specifike. “Nuk mund t’ju them këtë”, tha ai.
Trump gjithashtu nuk zbuloi se me cilët udhëheqës iranianë po bisedonte administrata e tij, duke vënë në dukje se disa nga bashkëbiseduesit e mëparshëm ishin vrarë.
“Shumica e atyre njerëzve janë zhdukur. Disa nga njerëzit me të cilët po negocionim janë zhdukur, sepse kjo ishte një – kjo ishte një goditje e madhe”, tha ai. “Ata duhet ta kishin bërë më herët, Michael. Ata mund të kishin bërë një marrëveshje. Ata duhet ta kishin bërë më herët. Ata po luanin shumë zgjuar”.
Kjo deklaratë vjen menjëherë pasi Trump i tha një gazetari tjetër se 48 udhëheqës iranianë u vranë në sulmet e SHBA-së dhe Izraelit ndaj Iranit.
