Klubi i Tottenham Hotspur ka marrë vendimin për ta larguar nga detyra trajnerin Ange Postecoglou, pavarësisht triumfit historik në Europa League gjatë këtij sezoni. Lajmi u bë i ditur përmes një komunikate zyrtare, ku u theksua se pas një analize të thellë të performancës së skuadrës, u vlerësua se objektivat sezonalë nuk janë përmbushur, shkruan 04 Online.
“Pas një rishikimi të performancave dhe pas reflektimeve të rëndësishme, Klubi mund të njoftojë se Ange Postecoglou është liruar nga detyrat e tij, ne i jemi jashtëzakonisht mirënjohës Ange për angazhimin dhe kontributin e tij gjatë dy viteve të tij në Klub. Ange do të mbahet mend gjithmonë si vetëm menaxheri i tretë në historinë tonë që dorëzon një trofe evropian, së bashku me figurat legjendare Bill Nicholson dhe Keith Burkinshaw,” thuhet në njoftimin e klubit londinez.
Edhe pse u bë vetëm trajneri i tretë në historinë e Tottenhamit që fiton një trofe evropian – duke iu bashkuar legjendave si Bill Nicholson dhe Keith Burkinshaw – pozita e dobët në Premier League i kushtoi vendin e punës. Tottenham e mbylli sezonin në një vend zhgënjyes, duke përfunduar në pozitën e 17-të në tabelë, vetëm një hap larg rënies nga elita.
Postecoglou, i cili mori drejtimin e klubit në verën e vitit 2023, kishte sjellë fillimisht entuziazëm me stilin e tij të lojës dhe qasjen sulmuese, por rezultatet e dobëta në kampionat dominuan pjesën më të madhe të sezonit.
Klubi i shprehu mirënjohje për angazhimin dhe kontributin e tij gjatë dy viteve në krye të skuadrës, duke e cilësuar si një figurë që do të mbahet mend për suksesin në Evropë, por që nuk arriti të përmbushë pritjet në garat vendore.
Tottenhami pritet të nisë menjëherë kërkimet për një trajner të ri, me qëllimin për të rikthyer stabilitetin dhe konkurrencën në nivelet më të larta të futbollit anglez./04 Online
