Juventusi ka siguruar kualifikimin në çerekfinalet e Kupës së Italisë pasi triumfoi bindshëm ndaj Udineses me rezultat 2-0, në ndeshjen e vlefshme për fazën e 1/8-tës.
Bianconerët dominuan skuadrën nga Udine dhe me këtë fitore kanë siguruar kalimin tutje, ku në çerekfinale do të përballen me Atalantën ose Genoan.
Pas ndeshjes, trajneri i bardhezinjve, Luciano Spalletti, foli në konferencën për shtyp, ku përveç analizës së lojës, lavdëroi edhe yllin e Kosovës, Edon Zhegrovën.
Show i shpejtë, impakt i madh – Zhegrova lë gjurmë dhe tifozët kërkojnë më shumë minuta për diamantin e Kosovës
“Fitoret janë të rëndësishme sepse janë e vetmja kurë për t’u ndjerë i lirë nga presioni dhe tensioni”, ka thënë fillimisht Spalletti.
“Gjithmonë kam parë diçka më të mirë ditë pas dite. Tani ekipi po fillon të mendojë ndryshe me topin në këmbë. Le të jemi të kënaqur sepse bëmë disa gjëra të mira”.
“Jam i kënaqur me performancën e Zhegrovës; ai ka qenë jashtë loje për një kohë të gjatë, ndoshta meritonte më shumë hapësirë. Gjithashtu u kënaqa kur e pashë duke ndjekur topin në zonën tonë të penalltisë”.
“Ai është një tel i fuqishëm që gjithmonë mund të të frikësojë. Ai e sheh mundësinë për të pasuar kur të tjerët shohin një mur”, përfundoi italiani.
Ndryshe, Zhegrova hyri në fushë në minutën e 83-të dhe arriti të tregojë disa gjëra të mira gjatë minutave të fundit të ndeshjes.
