Përfaqësuesi i BE-së për dialog, Peter Sorensen ka arritur në ndërtesën e Qeverisë së Kosovës.
Para tij hyri edhe kryeministri në detyrë, Albin Kurti. Ky i fundit do ta presë në takim përfaqësuesin e BE-së. Më pas Sorensen do të takohet edhe me presidenten Vjosa Osmani, në orën 10:00.
Vizita e Sørensenit në Prishtinë është pjesë e një turi më të gjerë në rajon, gjatë të cilit ai pritet të zhvillojë takime me nivelin më të lartë politik si në Kosovë ashtu edhe në Serbi.
Një ditë më pas, të enjten, Sørensen pritet të udhëtojë drejt Beogradit, ku janë planifikuar takime me lidershipin shtetëror serb, ndërsa agjenda e plotë e vizitës atje është ende në proces finalizimi.
Kjo shënon vizitën e parë të Peter Sørensenit që nga marrja e mandatit të dytë si ndërmjetësues i Bashkimit Evropian në procesin e dialogut Kosovë–Serbi.
