Studimet e fundit tregojnë se koha e gjatë para ekranit mund të ndikojë negativisht në zhvillimin e trurit të fëmijëve, sidomos në vitet e para të jetës. Sipas ekspertëve, ekspozimi i hershëm dhe i pakontrolluar ndaj pajisjeve elektronike si telefonat, tabletët apo televizorët, lidhet me vonesa në zhvillimin e të folurit, probleme me përqendrimin dhe dobësim të aftësive sociale.
Institucionet shëndetësore, përfshirë Akademinë Amerikane të Pediatrisë, rekomandojnë që fëmijët nën moshën 2 vjeç të shmangin sa më shumë kontaktin me ekranet, përveç rasteve të veçanta si video-thirrjet me familjarë. Ndërsa për moshën 2 deri në 5 vjeç, rekomandohet që koha para ekranit të mos kalojë një orë në ditë dhe të përmbajë vetëm përmbajtje edukative, gjithmonë nën mbikëqyrjen e një të rrituri.
Koha e tepërt para ekranit, veçanërisht përmbajtjet me ritëm të shpejtë dhe pa vlerë edukative, mund të ndikojë në zonat e trurit që lidhen me gjuhën, kujtesën dhe përqendrimin. Gjithashtu, mund të reduktojë kohën që fëmijët kalojnë në ndërveprime reale me prindërit apo bashkëmoshatarët, çka ndikon në zhvillimin emocional dhe social.
Megjithatë, ekspertët theksojnë se pajisjet digjitale nuk janë domosdoshmërisht të dëmshme nëse përdoren në mënyrë të kontrolluar dhe me përmbajtje të përshtatshme për moshën. Aplikacionet edukative dhe programet interaktive, të përdorura së bashku me prindërit, mund të ndihmojnë në zhvillimin e disa aftësive si koordinimi sy-dorë apo të menduarit logjik.
Prindërit këshillohen të vendosin kufij të qartë, të shmangin përdorimin e ekraneve para gjumit dhe të sigurojnë një balancë të shëndetshme mes kohës digjitale dhe aktiviteteve fizike apo sociale në jetën reale.
/04 Online
