Kafeja është një pjesë e pandashme e rutinës së përditshme për miliona njerëz në mbarë botën. Ajo ofron një nxitje të shpejtë energjie, përmirëson përqendrimin dhe është një zakon i këndshëm shoqëror.
Megjithatë, ajo është e dëmshme kur konsumohet së bashku me disa lloje të ilaçeve, pasi mund të ndikojë në efektivitetin e tyre ose të rrisë rrezikun e efekteve anësore. Në një artikull të publikuar nga Independent, janë theksuar disa kategori kryesore ilaçesh që ndërveprojnë me kafeinën në mënyra që kërkojnë vëmendje të veçantë.
Ilaçet për ftohjen dhe gripi
Shumë produkte kundër ftohjes dhe gripit përmbajnë pseudoefedrinë, një substancë dekongjestante me efekte stimuluese. Kur kombinohet me kafeinë, një tjetër stimulues i fuqishëm, efekti i përgjithshëm mund të jetë tepër i fortë. Kjo ndërveprim mund të shkaktojë nervozizëm, pagjumësi, rrahje të shpejta të zemrës, dhimbje koke dhe madje edhe rritje të sheqerit në gjak apo temperaturës trupore, veçanërisht tek njerëzit me diabet. Për më tepër, shumë prej këtyre barnave tashmë përmbajnë kafeinë të shtuar, çka e rrit më tej rrezikun.
Medikamente për tiroiden
Levotiroksina, një ilaç i zakonshëm për trajtimin e hipotiroidizmit, ndikohet drejtpërdrejt nga kafeja. Konsumimi i kafesë brenda pak minutash pas marrjes së këtij ilaçi mund të ulë përthithjen e tij deri në 50%, duke çuar në rikthimin e simptomave të sëmundjes pavarësisht marrjes së rregullt të ilaçit. Arsyeja kryesore është se kafeina përshpejton lëvizshmërinë e zorrëve dhe mund të ndërveprojë me medikamentin në stomak, duke penguar përthithjen e tij të plotë.
Ilaçet psikiatrike
Ndërveprimi mes kafeinës dhe ilaçeve psikiatrike është kompleks. Disa antidepresivë modernë, si SSRI-të, mund të kenë përthithje më të ulët në prani të kafeinës, duke i bërë më pak efektivë. Nga ana tjetër, antidepresivët më të vjetër të grupit TCA, si dhe ilaçe të tilla si klozapina, metabolizohen nga enzima të mëlçisë (CYP1A2), të njëjtat që metabolizojnë edhe kafeinën. Kur kafeja merret në sasi të mëdha, kjo mund të vonojë zbërthimin e ilaçeve, duke rritur rrezikun e efekteve anësore si përgjumje, konfuzion ose agjitacion. Një studim ka treguar se pirja e dy deri në tre filxhanëve kafe në ditë mund të rrisë nivelet e klozapinës në gjak deri në 97%.
Qetësuesit e dhimbjeve
Aspirina dhe paracetamoli shpesh përmbajnë kafeinë për të përshpejtuar veprimin e tyre dhe për të shtuar efektivitetin kundër dhimbjes. Por pirja e kafesë së bashku me këta ilaçe mund të irritojë stomakun dhe të rrisë rrezikun e gjakderdhjeve të brendshme, veçanërisht në rastet kur përdoren në mënyrë të vazhdueshme ose në doza të larta.
Ilaçet për zemrën
Për personat me probleme kardiovaskulare, konsumi i kafesë mund të paraqesë një sfidë të veçantë. Kafeina ka efektin e përkohshëm të rritjes së tensionit të gjakut dhe rrahjeve të zemrës, gjë që mund të ndërhyjë në mënyrën si veprojnë ilaçet për tensionin e lartë apo aritmitë. Kjo nuk nënkupton se kafeja duhet eliminuar plotësisht, por rekomandohet monitorim i kujdesshëm dhe, në disa raste, kalimi në versione pa kafeinë.
