Komisioni për Punë të Jashtme dhe Diasporë ka pritur sot në takim një delegacion nga Ministria për Evropën dhe Punët e Jashtme të Shqipërisë.
Pas takimit, kryetari i komisionit, Haki Abazi, tha se kanë diskutuar për të bashkëvepruar dhe bashkërenduar agjendën e përbashkët në Këshillin e Sigurimit, aty ku Shqipëria është anëtare e përkohshme.
“I gjithë bashkëbisedimi jonë u fokusua në mundësinë dhe potencialin e bashkëveprimit dhe bashkërendimit të punëve tona në drejtim të Kombeve të Bashkuara, aty ku Shqipëria tani më është anëtare e Këshillit të Sigurimit. Sigurisht është një listë e gjatë e veprimeve që kanë ndodhur dhe janë duke ndodhur, por është një moment intensifikimi sidomos drejt institucioneve ndërkombëtare”.
“Nuk jemi këtu për të rritur shpresat në kuptimin e anëtarësimit të Kosovës në Kombet e Bashkuara, e dimë mirë që është një proces i gjatë dhe i vështirë. Por, rrethanat që jemi mundësojnë një bashkëveprim më të madh të dy shteteve në këtë drejtim”.
Ndërsa, përfaqësuesi nga Ministria e Punëve të Jashtme të Shqipërisë, Gazmend Turdiu, tha se konsolidimi i pavarësisë dhe shtetësisë së Kosovës ka ndikim në sigurinë dhe stabilitetit të rajonit.
Ai nënvizoi se do të shtyjnë përpara agjendat e përbashkëta të dy shteteve në Këshillin e Sigurimit.
“Ne jemi të interesuar për të kontribuar për stabilitetin dhe sigurinë e Ballkanit Perëndimor, natyrisht çështja e konsolidimit të pavarësisë dhe shtetësisë së Kosovës është një gjë madhore që ka ndikim pozitiv në sigurinë dhe stabilitetin e gjithë rajonit. Ne shkëmbyem me shumë kënaqësi, në mënyrë të hapur, vëllazërore dhe miqësore, mendimet tona dhe biseduam si mund të bashkërendojmë për të shtyrë përpara në organizata ndërkombëtare, përfshirë në Këshillin e Sigurimit agjendat tona të përbashkëta”, tha ai, shkruan KP.
Ndryshe, javën e kaluar në Kosovë qëndroi edhe Komisioni për Punë të Jashtme i Shqipërisë.
