Ministria e Infrastrukturës ka publikuar të premten njoftimin për kontratë për ndërtimin e projektit rrugor në segmentin Prizren-Tetovë.
Vlera e parashikuar e projektit është 35 milionë euro, bazuar në dosjen e tenderit të publikuar në platformën shtetërore të prokurimit publik.
Kompanitë e interesuara për tenderin mund të dorëzojnë ofertat e tyre deri më 22 nëntor të këtij viti.
Hapja e tenderit është bërë një ditë pas vendimit të Qeverisë së Kosovës për shpronësimit e parcelave që prekin trasenë e projektit.
Ministri i Infrastrukturës, Liburn Aliu, ka treguar dje për shpalljen e njoftimit për kontratë për ndërtimin e kësaj rruge.
Qeveria ka marrë vendim për shpronësimin e parcelave që prekin trasenë e projektit të madh të rrugës Prizren-Tetovë.
“Përkundër sfidave dhe telasheve të trashëguara, po angazhohemi maksimalisht që projektet të marrin drejtimin e duhur”, ka thënë Aliu.
Ndërsa kryeministri Albin Kurti, në mbledhjen e qeverisë të mërkurën është shprehur se projekti ka një rëndësi të madhe. Ai ka thënë se rruga do të lidhet me dy autostrada në Kosovë dhe Maqedoninë e Veriut.
