Ambasadori i Gjermanisë në Kosovë, Jorn Rohde, ka thënë se e mbështetë deklaratën e homologut amerikan, Jeffrey Hovenier, se Gjykata Kushtetuese është i vetmi institucion që mund ta vlerësojë draft-statutin e Asociacionit.
Rohde ka thënë se Kosovës po i kërkohet një hap i parë në këtë drejtim, e ai është dërgimi i draft-statutit në Kushtetuese.
“E kam thënë publikisht shumë herë…Ne nuk po kërkojmë implementim të plotë të Asociacionit. Ne po kërkojmë për hapin e parë të dukshëm. Dhe ky është dërgimi i draft-statutit te Gjykata Kushtetuese e juaj. Sepse, siç tha kolegu im amerikan, Gjykata Kushtetuese është i vetmi institucion në këtë planet, që ka kompetenca të kontrollojë këtë draft-statut, asnjë institucion tjetër. Nëse Kosova nuk e bën këtë, është lehtë për palën tjetër të thotë nuk bëjmë gjë”, ka thënë Rohde.
Ai ka thënë nëse një gjë e tillë nuk bëhet do të ketë pasoja për Kosovën dhe mos anëtarësimi në Këshillin e Evropës sipas tij është një prej tyre.
Kryeministri i Kosovës javë më parë kishte deklaruar se draft-statuti i BE-së për Asociacionin duhet të dërgohet në Komisionin e Venecias.
