Shqiptimi i gjobave për thyerjen e rregullave në trafik bëhen shpeshherë shkas që shoferët të revoltohen dhe t’i pengojnë zyrtarët policorë. Përpos ofendimeve, ata eskalojnë edhe në kërcënime dhe sulme fizike, duke ua vështirësuar kryerjen e detyrave, raporton Gazeta Sinjali.
Një rast i tillë ka ndodhur sot paradite në rrugën “Ismail Kryeziu” në Prizren, ku Policia ka ndalur një veturë, shoferi i së cilës nuk posedonte dokumentet e regjistrimit.
Kjo i kushtoi të dyshuarit, me ç’rast zyrtarët policorë ia shqiptuan një tiketë për kundërvajtje në trafik. I revoltuar pse u gjobit, i dyshuari F.B., po dyshohet se ka penguar policët, madje njërin prej tyre edhe e ka kërcënuar se do pësojë keq.
Për ta vënë situatën nën kontroll, i dyshuari është arrestuar dhe shoqëruar në stacion policor për intervistim, ku para hetuesve ka dhënë deklaratën e tij lidhur me atë që ka ndodhur.
Pas përfundimit të procedurave policore, Prokurori i Shtetit ka urdhëruar inicimin e rastit ndaj të dyshuarit për veprën penale “Pengim i personave zyrtar gjatë kryerjes së detyrave zyrtare”.
