Një muaj paraburgim i është caktuar të pandehurit B.H., për dyshimin e kryerjes së veprës penale “fajde”.
Sipas Gjykatës Themelore në Prizren, nga 2016-a deri më 22 gusht të 2023-s, i jep të dëmtuarit F.S. 6.000 euro borxh, ndërsa me rastin e kthimit të të hollave iu kërkon nga 600 euro kamatë.
Në lëndën e tij thuhet se i dyshuari ia kishte kërkuar nga 600 euro shtesë krahas borxhit të dëmtuarit si kamatë, ndërsa deri në 2023-s i dëmtuari ia kishte kthyer gjithsej 49.200 euro.
“I gjendur në gjendje të rëndë ekonomike dhe duke mos arritur t’i paguajë shumat e kamatave, i dëmtuari F. më 18 shkurt 2018 merr nga i pandehuri B shumën e të hollave në vlerë prej 3,000 euro ndërsa në muajin mars nga i njëjti merr shumën e të hollave prej 2,000 euro, për të cilat paralajmërohet nga i pandehuri se për çdo vonesë duhet të paguajë nga 500 euro kamata mujore. I dëmtuari nga muaji mars 2018 deri në muajin janar 2023, në emër të shumës së marrë prej 5,000 euro vazhdon të paguaj nga 500 euro kamata mujore duke i dhënë të pandehurit shumën prej 29,000 (njëzetë e nëntë mijë) euro, në total i dëmtuari paguan në emër të kamatave për të pandehurin shumën prej 78,200 (shtatëdhjetë e tetë mijë e dyqind) euro, kur i dëmtuari nuk arrin t’ i paguajë kamatat, i pandehuri B.H., e paralajmëron se përveç borxhit bazë të marrë në fillim, duhet të paguajë nga 200 (dyqind) euro kamata ditore”, thuhet në njoftimin e Gjykatës.
Deri në 2023-n, i pandehuri i ka marrë 12.800 euro nga i dëmtuari.
Ai është arrestuar në flagrancë.
