KFOR-i mbrëmë pak para mesnate njoftoi se një kontingjent ushtarësh turk ka mbërritur në Kosovë. Misioni paqeruajtës i NATO-s tha se ky kontingjent do ta zëvendësojë një njësi të trupave italiane të dislokuara më parë si pjesë e Forcave Rezervë të KFOR-it, përcjell Reporteri.net.
KFOR-i sot ka publikuar fotografi të mbërritjes së këtij kontingjenti në vend.
“Dislokimi i kontingjentit turk pasqyron përkushtimin e palëkundur të KFOR-it për të vazhduar ofrimin e një mjedisi të sigurt për të mirën e të gjitha komuniteteve që jetojnë në Kosovë dhe lirinë e lëvizjes, në çdo kohë dhe në mënyrë të paanshme, në përputhje me mandatin e tij të OKB-së bazuar në Rezolutën 1244 të Këshillit të Sigurimit të Kombeve të Bashkuara të vitit 1999. Është gjithashtu një demonstrim tjetër konkret i angazhimit të vazhdueshëm të NATO-s drejt sigurisë së qëndrueshme në Kosovë dhe stabilitetit në të gjithë Ballkanin Perëndimor”, thuhet në postimin e KFOR-it.
