Në Mbretërinë e Bashkuar po testohet një analizë e re gjaku që mund të zbulojë shenjat e hershme të demencës, duke ofruar mundësinë për një diagnozë më të shpejtë dhe më të saktë. Kjo mund të ndihmojë pacientët të përfitojnë nga trajtime që ngadalësojnë përparimin e sëmundjes.
Stephanie Everill, një nga pjesëmarrëset e para në studimin “Sfida e Biomarkerit të Gjakut”, po përjeton humbje të kujtesës. “Nuk mbaj mend asgjë. Thjesht ka ikur memorja”, shprehet ajo. Pasi u diagnostikua me dëmtim të lehtë kognitiv (MCI) një vit më parë, ajo vendosi të veprojë shpejt, duke pasur parasysh historinë familjare me Alzheimer.
Sipas Shoqatës së Alzheimerit, vetëm 2% e pacientëve kanë akses në testet më të avancuara, si skanerat PET ose analizat e lëngut cerebrospinal. Kjo analizë e re gjaku mund të sjellë një ndryshim të madh, duke zbuluar proteina dhe tregues të lidhur me demencën në një mënyrë më të thjeshtë dhe më të aksesueshme.
Studimi drejtohet nga profesoresha Vanessa Raymon në Universitetin e Oksfordit, e cila thekson rëndësinë e një diagnoze të hershme për të përzgjedhur pacientët që mund të përfitojnë nga trajtimet në zhvillim. Barnat e reja, si Leqembi dhe Kisunla, kanë treguar se mund të ngadalësojnë përkeqësimin e simptomave, por janë efektive vetëm në fazat e hershme të sëmundjes.
Profesoresha Fiona Carragher nga Shoqata e Alzheimerit thotë se ky test gjaku mund të revolucionarizojë procesin diagnostikues. “Demenca është shkaku kryesor i vdekjeve në Britani dhe rreth një e treta e njerëzve mbeten të padiagnostikuar. Një test gjaku i thjeshtë dhe i saktë mund të jetë çelësi për të ndryshuar këtë situatë.”
Me rreth një milion njerëz të prekur nga demenca në Mbretërinë e Bashkuar vetëm në vitin 2024, kjo analizë e re mund të përfaqësojë një hap të madh përpara në kujdesin dhe trajtimin e pacientëve.
